Ščelkino

Ščelkino (ven.: Щёлкино, ukr.: Щолкіне, krim.-tat.: Щёлкино / Şçolkino) om lidn Kriman päivnouzmas. Se om Leninon rajonan lidnankund.

Ščelkino
Щёлкино (ven.)
Щолкіне (ukr.)
Şçolkino (krim.-tat.)

Lidnanznam	Flag
Valdkund	Venäma - de fakto Ukrain - de jure]]
Eläjiden lugu (2018)	10,328 ristitud
Pind	34,2 km²
Pämez'	Sergei Varavin (sügüz'ku 2014—)
Telefonkod	+7−36 567, ende +380−6557
Aigvö	UTC+3

Istorii

Eländpunktan aluz om pandud vn 1978 redukus Kriman atomelektrostancijan sauvojiden žiloks. Nimitihe sidä nevondkundaližen Kirill Ščelkin-atomfizikantedomehen (1911−1968) muštho vn 1982 16. päiväl sulakud. Vl 1981 AES:an sauvomine oli zavottüd läz žilod, vl 1987 azotihe sauvondad tahondan geologižen stabilitomuden tagut. Vn 1992 18. päiväl tal'vkud lidnanvuitte žilo sai lidnan statusad. Vn 2016 uhokuspäi atomstancijan jändusiden panend mantazole tegese.

Ščelkino šingotase merikurortaks, sörfingan tahoks. Ei ole tegimištod lidnas, planiruitas industriališt parkad enččen AES:an territorijal. Jogavozne «Respublika KaZantip»-danspopmuzikfestival' oigendase Ščelkinos.

Geografijan andmused

Lidn sijadase Azovmeren randal, 20 m ü.m.t. keskmäižel korktusel, om ümbärtud meren lahtil koumes polespäi. Kazantip-nem' om pohjoižhe, solakaz Aktaš-järv levigandeb suvhe lidnaspäi. Matkad Simferopolihesai om 144 km päivlaskmha-suvipäivlaskmha orhal vai 174 km avtotedme. Lähembaižed lidnad oma Feodosii 55 km suvipäivlaskmha orhal vai 65 km avtotedme i Kerč 50 km päivnouzmha orhal vai 80 km avtotedme.

Ščelkino om lidnankundan üks'jäine eländpunkt.

Eläjad

Vl 2012 Ščelkinon eläjiden lugu oli 11 194 ristitud, vl 2014 — 10 620 ristitud. Kaikiš suremb ristitišt oli 14 659 eläjad vl 1989.

Rahvahad (enamba 0,4% vl 2014): venänikad — 72,3%, ukrainalaižed — 21,2%, totarlaižed — 0,8%, vaugedvenälaižed — 0,8%, toižed rahvahad — 2,0%, rahvahuden ozutandata — 2,9%.

Irdkosketused

• Lidnankundan sijaližen ičeohjastusen aluzkundoiden oficialine sait (горсовет.щелкино-рк.рф). (ven.)