Zadonsk

Zadonsk (ven.: Задо́нск) om Venäman lidn da lidnankund Lipeckan agjan suves. Se om Zadonskan rajonan administrativine keskuz.

Zadonsk
Задонск

Lidnanznam	Flag
Valdkund	Venäma
Eläjiden lugu (2021)	9,887 ristitud
Pind	12,58 km²
Pämez'	Vladimir Kalugin (reduku 2010—)
Telefonkod	+7−47 471-xx-xxx
Avtokod	48
Aigvö	UTC+3 (MSK+0)

Istorii

Eländpunktan aluz om pandud vl 1615 kuti Teševk-slabad (ven.: Тешевка vai Тешевская) udenno mez'jumalankodinno, nimitihe penen sijaližen jogen mödhe. Žilo sai makundan lidnan statusad vn 1779 25. sügüz'kud udenke Zadonskoi-nimitusenke lidnan sijadusen mödhe Don-jogen randal ku ajelta Moskvaspäi. Aigan mändes lidnan nimituz lüheni i kändihe nügüdläižikš. Toižen mail'man sodan aigan lidn oli alištunu nacistoiden aviacijan bombardiruindale kaks' kerdad.

Zadonsk šingotase sömtegimištol (saharan tegim, mineralveden tegim, leibtegim, lihaceh) i turizmal.

Geografijan andmused

Lidn sijadase rajonan suvipalas, Don-jogen hural randal, 140 m ü.m.t. keskmäižel korktusel. Teševk-jogi (ven.: Тешевка nellän kilometrad pitte) jagab lidnad poleti i lankteb Donha.

Matkad Lipeckhasai om 51 km päivnouzmha-pohjoižpäivnouzmha orhal vai 57 km avtotel. Toine lähembaine lidn om Jelec (raudtestancii) 38 km lodeheze orhal vai 43 km avtotedme. «Don»-avtote (M4-trass) ümbärdab lidnad suvipäivlaskmaspäi, edel 2000. vot läbiti.

Tobmuz

Zadonsk om lidnankundan üks'jäižeks eländpunktaks. Lidnankundan pind — 12,58 km².

Lidnankundan tobmuden pämez' om sen Administracijan pämez'. Lidnan Administracijan pämez' om Vladimir Kalugin vn 2010 redukuspäi. Lidnan Deputatoiden nevondkundan ezimez' om Jevgenii Grigorjev vn 2023 heinkuspäi. Edeline nevondkundan ezimez' om Aleksandr Anohin, radoi vn 2023 kezakuhusai.

Eläjad

Vl 1897 ristitišt oli 7 500 eläjad, vl 1939 — 6 900 eläjad. Vn 2010 Venäman rahvahanlugemižen mödhe lidnan eläjiden lugu oli 9 698 ristitud, rajonan kaks' seičemendest, vn 2021 — 9 887 ristitud. Kaik 9 641 eläjad oli lidnas vl 2017. Kaikiš suremb lidnan ristitišt oli 10..11 tuhad eläjid vll 1979−2009 (11 700 rist. vl 2000).

Rahvahad (2010): venälaižed — 98,6 %, toižed rahvahad — 1,4 %. Vn 2021 rahvahanlugemižen mödhe (enamba 0,4 %): venälaižed — 97,1 %, ukrainalaižed — 0,5 %, toižed rahvahad — 1,2 %, rahvahuden ozutandata — 1,2 %.

Ortodoksižen hristanuskondan nened pühäpertid oma kaičenus i saudud lidnas: Jumalanmaman sündundan Zadonskan mez'jumalankodi, se om avaitud lidnan keskuses vspäi 1610 (Jumalanmaman Vladimiran jumalaižen päjumalanpert', viž jumalanpertid i kaks' časounäd), mugažo Stroican päjumalanpert', üksin jumalanpert' i časoun'. Kaks' naižjumalankodid oma olmas lidnan ümbrištos: ph. Tihonan Zadonskalaižen Toižetamižen i Jumalanmaman Tihovonskii (Tüninon).

Lapsiden opendusen aluzkundad oma koume päivkodid (nomer 3, 5, 6), gimnazii nomer 1, čomamahtoiden škol, lapsiden da norišton sportškol. Zadonskan politehnine tehnikum om lidnan professionaližen opendusen aluzkundaks.

Galerei

• 
  Jumalanmaman Vladimiran jumalaižen päjumalanpert', vn 2020 nägu
• 
  Zadonskan mez'jumalankodin pala, vn 2012 nägu
• 
  Teševkan randird (2007)
• 
  Uz' adivpert' (2011)
• 
  Avtobusstancii vl 2012

Irdkosketused

• Lidnan tobmuden aluzkundoiden sait (zadonsk48.admlr.lipetsk.ru). (ven.)