Dankov

Dankov (ven.: Данко́в) om Venäman lidn da lidnankund Lipeckan agjan pohjoižes. Se om Dankovan rajonan administrativine keskuz.

Dankov
Данков

Lidnanznam
Valdkund	Venäma
Eläjiden lugu (2021)	19,726 ristitud
Pind	23,98 km²
Pämez'	Oleg Rassolov (tal'vku 2020—)
Telefonkod	+7−47 465-xx-xxx
Avtokod	48
Aigvö	UTC+3 (MSK+0)

Istorii

Edeline Donkov-lidn (ven.: Донко́в) mülüi Räzanin ruhtinazkundha, se oli polttud mongoližen vägitungendan aigan. Dankovan rajonan Strešnevo-žilo sijadase lidnan sijas 30 km pohjoižhe-lodeheze rajonkeskusespäi Don-jogen hural randal.

Nügüdläine eländpunkt mainitase ezmäižen kerdan vl 1568, konz Moskvan ruhtinased läksiba «panda lidnoid», nimitihe Dankov:aks edeližen lähižen lidnan mödhe. Anttihe makundan lidnan statusad vl 1804. «Ranenburg — Smolensk»-raudte läbiti lidnad 1890-nzil vozil. Kätihe Dankovad žiloks vl 1924, se sai lidnan statusad tošti vn 1957 17. päiväl uhokud.

Dankov šingotase plastmassan, sintetižen tervan i päiväižpaneliden tegimel, biopuhtastandan ladimiden tegimel, sauvondmaterialiden tegimil (šeben', raudbetontegesed), sömtegimištol (lihategim, leibtegim), mugažo omblendceh radab.

Geografijan andmused

Lidn sijadase rajonan suvipäivnouzmas, Don-jogen üläjoksmusen molembil randoil, 140 m ü.m.t. keskmäižel korktusel.

Matkad Lipeckhasai om 78 km suvhe-suvipäivnouzmha orhal, 85 km avtotel vai 210 km raudtel. Lähembaine lidn om Lebedän' 27 km suvhe orhal, 35 km avtotedme vai 50 km raudtedme. Dankov-raudtestancii radab keskustal Lev Tolstoi-žilospäi vaiše jüguiden täht vspäi 2014.

Tobmuz

Dankov om lidnankundan üks'jäižeks eländpunktaks. Lidnankundan pind — 23,98 km².

Lidnan Deputatoiden nevondkundan ezimez' om Oleg Rassolov vn 2020 tal'vkuspäi. Edeline nevondkundan ezimez' om Ivan Kremnev (tal'vku 2012 — kezaku 2020). Lidnankundan Administracii om likvidiruidud vn 2022 uhokus. Andrei Pereverzev oli sen jäl'gmäižen pämehen vm 2019 sügüz'kuspäi i likvidatoral. Edeline Administracijan pämez' oli Aleksei Levin (sügüz'ku 2015 — sügüz'ku 2019).

Eläjad

Vl 1897 lidnan ristitišt oli 9 100 eläjad, vl 1959 — 12 703 eläjad. Vn 2010 Venäman rahvahanlugemižen mödhe lidnan eläjiden lugu oli 21 064 ristitud, rajonan koume videndest. Kaik 19 120 eläjad oli lidnas vl 2017. Kaikiš suremb lidnan ristitišt oli 23..24 tuhad eläjid vll 1979−2003 (24 800 rist. vl 1996).

Rahvahad (2010): venälaižed — 97,8 %, toižed rahvahad — 2,2 %.

Ortodoksižen hristanuskondan viž pühäpertid oma kaičenus i saudud lidnas: Jumalanmaman Tihvinan jumalaižen päjumalanpert' i nell' jumalanpertid.

Dankovan agrotegimištoline tehnikum om lidnan professionaližen opendusen aluzkundaks.

Galerei

• 
  Rajonan sodakomissariat (2019)
• 
  Jumalanmaman Tihvinan jumalaižen päjumalanpert', vn 2013 nägu
• 
  Dankovan nägu Don-jogen pälpäi (2013)
• 
  Stadionan verai vl 2013
• 
  Kodirandantedištandmuzei, nägu taganpäi (2013), ende jumalanpert'

Irdkosketused

• Lidnan Deputatoiden nevondkund rajonan tobmuden admdankov.ru-saital. (ven.)
• Lidnan istorijan sait (goroddankov.narod.ru). (ven.)