Votkinsk

Votkinsk (udm.: Вотка, Вотка кар, ven.: Во́ткинск) om Venäman lidn da municipaline ühtnik (lidnümbrik) Udmurtijan Tazovaldkundan päivnouzmas. Se om kahtendel sijal eläjiden lugun mödhe tazovaldkundas. Lidn om Votkinskan rajonan administrativižeks keskuseks mugažo (ei ole sen palaks).

Votkinsk
Воткинск (ven.)
Вотка / Вотка кар (udm.)

Lidnanznam	Flag
Valdkund	Venäma
Eläjiden lugu (2021)	96,861 ristitud
Pind	112,18 km²
Pämez'	Aleksei Zametajev (kezaku 2018—)
Telefonkod	+7−34 145-xx-xxx
Avtokod	18
Aigvö	UTC+4 (MSK+1)

Lidnan generaližen planan rajonad (2009)

Istorii

Eländpunktan aluz om pandud vl 1759 kuti žilo sauvomha Votkinskan raudantegint Pötr Šuvalov-grafan tahton mödhe. Radnikžilo sai lidnan statusad vl 1935. Om Udmurtijan palaks vspäi 1937. Votkinskan tegim om valdkundan järed edheotand tähäsai.

Votkinskan ižandusen päsarakod oma sodakompleksan tehmine (kontinentidenkeskeižed ballistižed raketad — «Jars», «Bulav», «Topol'-M», operativiž-taktižed «Iskander»-raketad), mašiništonsauvomine (kivivoin da gazan samižen täht i kaivuzmašiništ), elektromašiništon pästand, sauvondmaterialiden tehmine (savič, bazal'tizoläcii), sömtegimišt.

Geografijan andmused

Lidn sijadase Votk-jogen (udm.: Идӟи) i Votkinskan uiton randoil (Kamanjogen oigedpol'ne bassein), 130 m keskmäižel korktusel valdmeren pindan päl. Matkad Iževskan keskushesai om 52 km suvipäivlaskmha orhal vai 54 km avtotedme. Lähembaine lidn om Čaikovskii (Permin rand) 32 km suvhe orhal vai 42 km avtol.

Votkinsk om lidnümbrikon üks'jäine eländpunkt.

Eläjad

Vn 2010 kaiken Venäman rahvahanlugemižen mödhe eläjiden lugu oli 99 022 ristitud. Kaikiš suremb ristitišt oli 105 tuhad eläjid vozil 1991−1993.

Ortodoksižen hristanuskondan kahesa pühäpertid oma olmas lidnas: päjumalanpert', viž jumalanpertid i kaks' časounäd. Islaman uz' pühäpert' vanhan sijas om avaitud vl 2021.

Professionaližen opendusen aluzkundad oma mašiništonsauvomižen tehnikum, Tazovaldkundan medkolledžan Votkinskan filial, muzikaliž-pedagogine kolledž, Iževskan üläopendusen aluzkundoiden kaks' filialad.

Edeline lidnümbrikon pämez' om Vladimir Perevozčikov (viluku 2012 — viluku 2018).

Transport

Avtobusad da taksid oma kundaližtransportaks lidnas. Votkinsk-raudtestancii om olmas vspäi 1919, kuti «Iževsk — Votkinsk»-jono-ki.

Lähembaine lendimport sijadase Iževskas.

Galerei

• 
  Lidnan administracijan sauvuz (2015)
• 
  Pötr Čaikovskii-muzikankirjutajan muzei (2013, usadib i sündundan sija)
• 
  Pühän Jumalanmaman Blagoveššenjan päjumalanpert', vn 2019 nägu
• 
  Sündun Toižetamižen jumalanpert', vn 2019 nägu
• 
  «Votkinskii zavod»-edheotandan kontor vl 2019 (Votkinskan tegim)
• 
  Votkinskan uiton padosein vl 2019
• 
  Keskškol nomer 15, vn 2015 nägu
• 
  «Jubileinii»-kul'turkeskuz i koncertzal (2016)
• 
  «Svetlana»-torguindkeskuz (2015)
• 
  Lidnan poliklinik vl 2013 (edel 1917. vot hospis)

Irdkosketused

• Municipaližen «Votkinsk-lidn»-ühtnikan tobmuden aluzkundoiden oficialine sait (votkinsk.ru). (ven.)