Možg

Možg (ven. i udm.: Можга) om Venäman lidn da municipaline ühtnik (lidnümbrik) Udmurtijan Tazovaldkundan suvipäivlaskmas. Sijadase Možgan rajonan keskuses, om sen administrativižeks keskuseks, ei mülü rajonha.

Možg
Можга (ven. i udm.)

Lidnanznam
Valdkund	Venäma
Eläjiden lugu (2017)	49,617 ristitud
Pind	31 km²
Pämez'	Aleksei Šišov (2015—)
Telefonkod	+7−34 139-xx-xxx
Avtokod	18
Aigvö	UTC+4 (MSK+1)

Istorii

Eländpunktan aluz om pandud vl 1835 kuti Süginskii tegim (udm.: Сюга шур, ven.: Сюгинский завод) pästamha stökoltegesid sijaližes kvarcletkespäi. Sauvoihe tegint Jelabugan Fedor Černov-torgovanan rahoil da tahtol.

Vozil 1924−1929 radnikžilon nimi oli Krasnii-žilo (udm.: Красной, ven.: Красный посёлок). Vl 1924 sirtihe Možgan makundan keskust sihe, sikš miše luja lämoipalo tegihe enččes keskuses — Možg-küläs (8 km suvhe lidnaspäi). Žilo sai lidnan statusad vl 1926. Vspäi 1929 lidn nimitase nügüdläižikš Možg-külän da udmurtalaižiden rodun mödhe. Vspäi 1963 alištub tazovaldkundan tobmudele oikti.

Geografijan andmused

Lidn sijadase Süganjogen oiktal randal tobjimalaz (udm.: Сюгы, Vätkanjogen hurapol'ne bassein), 150 m keskmäižel korktusel valdmeren pindan päl. Om ümbärtud mecoil. Matkad Iževskhasai om 76 km pohjoižpäivnouzmha orhal vai 94 km R320-avtotedme (läbitab lidnad suvipäivnouzmas).

Možg om lidnümbrikon üks'jäine eländpunkt.

Eläjad da ižanduz

Vn 2010 kaiken Venäman rahvahanlugemižen mödhe eläjiden lugu oli 47 961 ristitud. Kaikiš suremb ristitišt oli vl 2014 — 49 841 eläjad. Ortodoksižen hristanuskondan kaks' jumalanpertid da islaman pühäpert' oma lidnas. Professionaližen opendusen aluzkundad: pedagogine kolledž, veterinarine kolledž, medicinine škol, 2 profškolad.

Rahvahad (vl 2010, ozutadud rahvahudenke): venälaižed — 56,5%, udmurtalaižed — 25,8%, totarlaižed — 15,6%, toižed rahvahad — 2,1%.

Ižandusen päsarakod oma valamiž- da räkänvastaižiden tegesiden edheotandad, metallan ümbriradmine, stökol- da plastikpakuitesen tehmine, meblin i kanctavaroiden pästand puspäi, sömtegimišt.

Avtobusad oma kundaližeks transportaks. Vspäi 1916 Kazan' — Jekaterinburg raudte läbitab lidnad, nimitihe Možg-raudtestancijad Süginskai-stancijaks Toižen mail'man sodan lophusai.

Irdkosketused

• Municipaližen «Možg-lidn»-ühtnikan tobmuden aluzkundoiden oficialine sait (mozhga-gov.ru). (ven.)