Vitegran rajon

Vitegran rajon (ven.: Вытегорский район) om rajon Vologdan agjas.

Vitegran rajon
Вытегорский район

Znam	Flag
Valdkund	Venäma
Administrativine keskuz	Vitegr
Eläjiden lugu (2015)	25,302 ristitud
Pind	13,100 km²

Administrativine keskuz om Vitegranlidn.

Istorii

Rajonan aluz om pandud vl 1927 elokun 1. päiväl Leningradan agjan Pöudon ümbrikos. 1930 heinkun 23. päiväl heitihe ümbrikod, i vhesai 1937 rajon mülüi Leningradan agjaha kuti administrativine ühtnik. Rajon om olmas nügüdläižiš röunoiš vspäi 1959.

Geografijan andmused

Vitegran rajon om Vologdan agjan lodehline taho. Se om kaikiš suremb agjan rajon pindan mödhe (13 100 km²). Mec otab seičeme ühesandest rajonan territorijad, se om kavag'mec tobjimalaz.

Röunatab kahesanke Venäman rajonanke:

• päivnouzmas Arhangel'skan agjan Kargopolin rajonanke;
• suvipäivnouzmas Vologdan agjan Kirillovan rajonanke;
• suves Vologdan agjan Vaškiden, Belozerskan da Babajevon rajonidenke;
• päivlaskmas Leningradan agjan Kos'kenaluižen rajonanke;
• lodehes Karjalan Tazovaldkundan Änižröunan rajonanke;
• pohjoižes Karjalan Tazovaldkundan Pudožan rajonanke.

Volgan-Baltijanmeren vezite läbitab territorijan keskusen. Atlek-čokkoim sijadase rajonan pohjoižpäivnouzmas, se om ühthine jogiden koumen basseinan täht: Atlantižen valdmeren, Jävaldmeren da Kaspijan meren. Znamasine jogi om Andom. Kaikiš suremb vezišt om Änine, se mülüb rajonha vaiše paloin.

Londuseližed varad oma mouckivi, mineraližed mujud, mec, kala, reskvezi.

Vs 2013 semendkun 30. päiväspäi rajonan territorii jagase 10 küläkundaks da 1 lidnankundaks (Vitegr-lidn).

Tobmuz

Vs 2013 sügüz'kun 17. päiväspäi Aleksandr Pavlikov radab rajonan da sen administracijan pämehen (7 ohjandust).

Käskusenandai tobmuz om Ezitajiden Suim (15 ezitajad), Aleksandr Zimin radab sen ezimehen vs 2013 redukun 4. päiväspäi.

Kaik valičendad oleldas kerdan vides vodes.

Eläjad

Vn 2010 Venäman rahvahanlugemižen mödhe eläjiden lugu oli 29 058 ristitud.

Kaik om 208 eländpunktad rajonas, sidä kesken 1 lidn, 18 žilod da 189 küläd.

Toižed sured eländpunktad oma Depo-žilo (2,8 tuh. rist. vl 2002), Annan Sild-külä (1,9 tuh. rist. vl 2010), Šušt-žilo (1,2 tuh. rist. vl 2002) da Devätinad-külä (1,1 tuh. rist. vl 2010).

Ižanduz

Rajonan ižandusen päsarakod oma mecan ümbriradmine, vezitransport da turizm, tarbhaižiden kaivatusiden samine, elektrusen tehmine, sömtegimišt.

Irdkosketused

• Vitegran rajonan administracijan oficialine sait (vytegra.munrus.ru). (ven.)
• Tedod rajonas agjan oficialižes vologda-oblast.ru-portalaspäi. (ven.) (angl.)