Asino

Asino
Асино
Valdkund	Venäma
Eläjiden lugu (2021)	24,913 ristitud
Pind	90 km²
Pämez'	Andrei Kostenkov; (sulaku 2016—)
Telefonkod	+7−38 241-xx-xxx
Avtokod	70
Aigvö	UTC+7 (MSK+4)

Asino (ven.: А́сино) om Venäman lidn da lidnankund Tomskan agjan suvipäivnouzmas. Se om Asinon rajonan administrativine keskuz.

Istorii

Eländpunktan aluz om pandud vl 1896 kuti Ksen'jevk-žilo (ven.: Ксеньевка) elänzoitmaha tahod (sirdnikoiden žilo), möhemba Ksenievskii, nimitihe Nikolai II-imperatoran Ksenija-sizaren oiktastuseks. Udesnimitihe uden Asino-raudtestancijan mödhe vl 1933, raudtelikund vn 1937 tal'vkuspäi. Kätihe radnikžiloks vn 1945 12. päiväl tal'vkud. Asino-radnikžilo sai lidnan statusad vn 1952 31. päiväl keväz'kud. Vspäi 1973 oli alištunu agjan tobmudele oikti.

Asino šingotase mecan ümbriradmižen tegimil: faneran tehmine, špon koivuspäi, MDF-apak^[1], mugažo meblin pästandal (ištmiden fabrik), leibäntegim i kombisötken tegim ratas.

Geografijan andmused

Lidn sijadase rajonan suvipäivnouzmaižel röunal, Čulim-jogen hural randpolel i sen huran Terav Kurj-ližajogen oiktal randal (ven.: Быстрая Курья, 109 m ü.m.t. keskmäižel korktusel. Matkad Tomskhasai om 92 km suvipäivlaskmha orhal, 112 km avtotedme vai 93 km raudtedme. Toine lähembaine lidn om Anžero-Sudžensk (Kemerovon agj) 103 km suvhe orhal vai 134 km avtotedme.

Klimat om ven kontinentaline. Voden keskmäine lämuz om +0,4 C°, kezakun-elokun +15,9..+19,2 C°, tal'vkun-uhokun −15,8..−18,0 C°. Paneb sadegid 537 mm vodes, enamba kezakus-elokus (64..71 mm kus), vähemba uhokus-keväz'kus (19..21 mm kus).

Tobmuz

Asino om lidnankundan üks'jäižeks eländpunktaks. Lidnankundan pind — 90 km².

Lidnan tobmuden pämez' om sen Administracijan pämez'. Edeline lidnankundan pämez' om Jurii Kutepov (kül'mku 2012 — semendku 2015). Lidnan Nevondkundan ezimez' om Natal'ja Sedükova vn 2017 redukuspäi. Edeline Nevondkundan ezimez' om Nikolai Danil'čuk, radoi vn 2017 redukuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 25 618 ristitud, rajonan seičeme kümnendest, vn 2021 — 24 913 ristitud. Kaik 24 539 eläjad oli lidnas vl 2017. Kaikiš suremb lidnan ristitišt oli 33 741 eläjad vl 1989.

Ortodoksižen hristanuskondan kaks' pühäpertid^[2] oma olmas lidnas: Pühän Jumalanmaman Katken puine jumalanpert' (vspäi 1976), Pühän Jumalanmaman Katken kivine päjumalanpert' (om saudud vll 2011−2018).

Lapsiden opendusen aluzkundad oma severz'-se päivkodid, koume keskškolad (nomer 1, 4, 5), gimnazii (nomer 2), ehtškol (nomer 9), lapsiden da norišton sädamižen keskuz, kaks' sportškolad. Asinon tegimištoližen industrijan da holitusen tehnikum^[3], Tomskan agrarižen kolledžan filial i Tomskan valdkundaližen arhitekturiž-sauvonduniversitetan filial oma lidnan professionaližen opendusen aluzkundoikš.