Kolpaševo

Kolpaševo (ven.: Колпа́шево) om Venäman lidn da lidnankund Tomskan agjan keskuzpalas. Se om Kolpaševon rajonan administrativine keskuz.

Kolpaševo
Колпашево

Lidnanznam
Valdkund	Venäma
Eläjiden lugu (2021)	20,824 ristitud
Pind	35 km²
Pämez'	Aleksei Ščukin (semendku 2016—)
Telefonkod	+7−38 254-xx-xxx
Avtokod	70
Aigvö	UTC+7 (MSK+4)

Istorii

Eländpunktan aluz om pandud 17. voz'sadan augotišes, nimitihe alusenpanijoiden Kolpašnikovad-valdkundmehiden kanzannimen mödhe. Vspäi 1878 oli žiloks, 1933 kätihe radnikžiloks. Kolpaševo sai lidnan statusad vl 1938. Oli Nariman ümbrikon administrativižeks keskuseks (1932−1944). Vll 1941−1943 Novosibirskan pedagogine institut oli evakuiruidud tänna, ičeze opendajiden institut oli avaitud vl 1940 i oli olmas vhesai 1956.

Kolpaševo šingotase «Metallist»-kabel'tegimel i sömtegimištol (leibänkombinat, kalategim, mineralvezi), gazanveimiden sauvondan da holitusen (lendimport) edheotandoil.

Geografijan andmused

Lidn sijadase Obinjogen oiktal randal, 65 m ü.m.t. keskmäižel korktusel. Tahondan sä om Edahaižen Pohjoižen arvoimižihe tazostadud.

Matkad Tomskhasai om 237 km suvipäivnouzmha orhal, 318 km avtotedme vai Obin ülezjogen. Toižed lähembaižed lidnad oma Asino 240 km i Seversk 224 km suvipäivnouzmha orhal, Kedrovii 215 km suvipäivlaskmha orhal vai 380 km avtotedme (sidä kesken tal'vtedme). Lähembaine raudtestancii sijadase Vauged Jar-žilos 145 km päivnouzmha avtotedme.

Klimat om ven kontinentaline. Voden keskmäine lämuz om −0,3 C°, kezakun-elokun +15,0..+18,4 C°, tal'vkun-uhokun −16,3..−19,2 C°. Ekstremumad oma −51,4 C° (viluku) i +34,6 C° (kezaku, heinku). Paneb sadegid 519 mm vodes, enamba kezakus-elokus (61..77 mm kus), vähemba vilukus-sulakus (19..26 mm kus). Voden keskmäine relätivine nepsuz om 75 %, kaikiš madalamb semendkus (63 %), korktemb kül'mkus (83 %).

Tobmuz

Togur-žilo (7 051 rist. vl 2015) da kaks' pen't küläd (Volkovo, Sever) mülüdas lidnankundha Kolpaševon ližaks. Lidnankundan pind — 909,06 km².

Lidnankundan tobmuden pämez' om sen Administracijan pämez'. Edeline lidnan pämez' om Aleksandr Černikov, radoi vn 2016 semendkuhusai. Lidnan Nevondkundan ezimez' om Mihail Mironov vn 2015 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 24 124 ristitud, lidnankundan — 32 001 ristitud, rajonan nell' videndest. Vn 2021 rahvahanlugemižen mödhe lidnan ristitišt oli 20 824 eläjad. Vl 2017 kaik 23 272 ristitud elihe lidnas i 30 502 ristitud kaikes lidnankundas. Kaikiš suremb lidnan ristitišt oli 31 319 eläjad vl 1989.

Ortodoksižen hristanuskondan Sündun Voznesen'jan kafedraline päjumalanpert' om saudud vll 2005−2013.

Lapsiden opendusen aluzkundad oma severz-se päivkodid, nell' keskškolad (nomer 2, 4, 5, 7), muzikškol, sportškol, lapsiden da norišton keskuz, lapsiden ekologiž-biologine keskuz. Professionaližen opendusen aluzkundad: Kolpaševon socialiž-tegimištoline kolledž, Tomskan maižanduztehnikuman filial, Tomskan medicinižen i pedagogižen kolledžiden filialad.

Galerei

• 
  TV-mačt Kolpaševo-lidnas (2014)
• 
  Ehtatim Obiš päliči vl 2011

Irdkosketused

• Lidnan tobmuden aluzkundoiden oficialine sait (kolpsite.ru). (ven.)