Pen' Višer

Pen' Višer (ven.: Ма́лая Ви́шера) om Venäman lidn da lidnankund Uz'lidnan agjan pohjoižes. Se om Penen Višeran rajonan administrativine keskuz.

Pen' Višer
Малая Вишера

Lidnanznam	Flag
Valdkund	Venäma
Eläjiden lugu (2020)	10,253 ristitud
Pind	29 km²
Pämez'	Mihail Tašči (reduku 2014—)
Telefonkod	+7−81 660-xx-xxx
Avtokod	53
Aigvö	UTC+3 (MSK+0)

Istorii

Eländpunktan aluz om pandud vl 1843 sauvomha «Moskv — Piter»-raudted i žiloks raudtestancijanno, nimitihe jogen mödhe. Vl 1879 Venäman ezmäine telefonpagin tegihe veimil Piterinke. Žilo sai lidnan statusad vl 1921. Suren sodan aigan lidn oli okkupiruidud penemb mi kus (24. reduku − 20. kül'mku 1941).

Pen' Višer šingotase sauvondmaterialiden pästandal (mecümbriradmine) i stökolantegimel (tehnižed tegesed i substancijad), mugažo ventilätortegim, omblend- i mebel'edheotandad ratas.

Geografijan andmused

Lidn sijadase Pen' Višerk-jogen randoil (ven.: Малая Вишерка, Olhavan oigedpol'ne bassein), 65 m ü.m.t. keskmäižel korktusel. Matkad Surhe Uz'lidnhasai om 65 km suvipäivlaskmha orhal vai 90 km avtotedme. Lähembaine lidn om Čudovo 44 km lodeheze orhal vai raudtel, 70 km avtol.

Kaik seičeme pen't küläd mülüdas lidnankundha Penen Višeran ližaks. Lidnankundan pind — 844,35 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 12 461 ristitud, lidnankundan — 12 654 ristitud, rajonan koume nelländest. Kaikiš suremb lidnan ristitišt oli 17 620 eläjad vl 1939 i 16 109 eläjad vl 1959. Vl 2017 kaik 11 015 ristitud elihe lidnas i 11 186 ristitud kaikes lidnankundas.

Ortodoksižen hristanuskondan nell' pühäpertid oma avaitud lidnas: kaks' jumalanpertid i kaks' časounäd.

Penen Višeran tehnikum om lidnan professionaližen opendusen aluzkundaks.

Galerei

• 
  Znam lidnan röunal (2008)
• 
  TV-antenn i torg Moskovskai-irdal
• 
  Söndtavaroiden lauk vl 2016
• 
  Adivpert', vn 2016 nägu
• 
  Pen' Višer-päraudtestancijan sauvuz vl 2014

Irdkosketused

• Penen Višeran lidnankundan da rajonan ühthižen administracijan oficialine sait (mvishadm.gosuslugi.ru). i sen vanh versii (mvadm.ru). (ven.)
• Lidnan informacine sait (mvgorod.ru). (ven.)