Okulovk

Okulovk (ven.: Окуло́вка) om Venäman lidn da lidnankund Uz'lidnan agjan keskuzpalan päivnouzmas. Se om Okulovkan rajonan administrativine keskuz (vspäi 1927).

Okulovk
Окуловка

Lidnanznam
Valdkund	Venäma
Eläjiden lugu (2023)	9,538 ristitud
Pämez'	Tat'jana Nesterova (sulaku 2018—)
Telefonkod	+7−81 657-xx-xxx
Avtokod	53
Aigvö	UTC+3 (MSK+0)

Istorii

Okulovk-eländpunkt mainitase ezmäižen kerdan vl 1495 Derevan pätinan aigkirjas kuti Poliščenskii-pagastan pala (ven.: Полищенский погост). Om raudtestancijaks «Moskv — Piter»-jonon sauvondan jäl'ghe vl 1851. Bumaganfabrik oli enččes. Vn 1928 25. päiväl kezakud kätihe Okulovkad da lähišt Parahino-Poddub'je-eländpunktad radnikžiloikš. Vn 1965 12. päiväl vilukud ühtištadihe žiloid i panihe Okulovk-lidnaks.

Okulovk šingotase plastmassvalamižtegesiden i gal'vanižkrepindoiden tegimel, «Agrokabel'»-tegimel i mebel'furnituran edheotandal.

Geografijan andmused

Lidn sijadase Peretn-jogen oiktal randal tobjimalaz (ven.: Перетна́ 39 km pitte, Mstan hura ližajogi, Il'mjärven bassein), 161 m ü.m.t. keskmäižel korktusel.

Matkad Surhe Uz'lidnhasai om 120 km päivlaskmha orhal vai 140 km avtotedme. Lähembaine lidn om Boroviči 35 km päivnouzmha orhal vai 40 km avtol.

Tobmuz

Kaik kaks' küläd mülüdas lidnankundha Okulovkan ližaks: Okulovk-külä (23 rist. vl 2010) i Šurkino (385 rist. vl 2010). Lidnankundan pind — 27,44 km².

Lidnankundan tobmuden pämez' om sen Deputatoiden nevondkundan ezimez'. Födor Ahmatov radab nevondkundan ezimehen. Edeline ezimez' om Jurii Vezenberg, radoi vn 2015 sügüz'kuspäi. Lidnan erigoittud Administracii om likvidiruidud vn 2016 uhokus, siš aigaspäi rajonan Administracii tegeb sen velgusidme. Jäl'gmäine lidnan Administracijan pämez' (lidnankundan pämez' sil aigal) oli Väčeslav Kudrävcev, radoi vn 2013 kezakuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 12 464 ristitud, lidnankundan — 12 872 ristitud, rajonan pol'. Vn 2021 rahvahanlugemižen mödhe lidnan ristitišt oli 9 949 eläjad. Vl 2017 kaik 10 470 eläjad oli lidnas i 10 848 ristitud kaikes lidnankundas. Kaikiš suremb lidnan ristitišt oli 19..20 tuh. eläjid vll 1967−1979 (20 tuh. rist. vl 1967).

Ortodoksižen hristanuskondan kaks' pühäpertid oma avaitud lidnas: ph. Aleksandr Nevalaižen jumalanpert' (om saudud vll 1900−1901) i ph. Serafim Sarovalaižen puine časoun' vspäi 2005.

Lapsiden opendusen aluzkundad oma nell' päivkodid (nomer 4, 5, 6, 8), koume keskškolad (nomer 1..3), norišton pert', čomamahtoiden škol N.A. Rimskii-Korsakovan nimed, sportškol. Borovičin agrotegimištoližen tehnikuman Okulovkan filial om lidnan professionaližen opendusen aluzkundaks.

Galerei

• 
  Lidnan i Okulovkan rajonan administracijan sauvuz (2010)
• 
  Ph. Aleksandr Nevalaižen jumalanpert', vn 2010 nägu
• 
  Rajonan käskuzkund (2010)
• 
  Kodirandantedištandmuzejan N. Mikluho-Maklajan nimed südäin (2016)
• 
  Okulovk-raudtestancijan sauvuz vl 2010

Irdkosketused

• Okulovkan lidnankundan lehtpoled rajonan tobmuden aluzkundoiden oficialižel okuladm.ru-saital. (ven.)