Nokia (lidn)

Nokia (mugažo suomen i ročin kelil, suomen virkand: [ˈnokiɑ]) om lidn da lidnankund Suomenman suvipäivlaskmas, Pirkanma-agjas. Se om Tamperehen päivlaskmaine ezilidn, valdkundan 33nz' lidn eläjiden lugun mödhe.

Nokia

Lidnanznam
Valdkund	Suomenma
Eläjiden lugu (2024)	36,030 ristitud
Pind	347,84 km²
Pämez'	Eero Väätäinen (2013—)
Telefonkod	+358-
Aigvö	tal'vel UTC+2, kezal UTC+3

Sil sanal voib olda toižid znamoičendoid; miše nähta niid, tulgat tänna.

Lidnankundan sijaduz agjas i valdkundas (2020)

Istorii

Vspäi 1868 sauvoškanzihe bumagantegint nügüdläižen lidnan tahondas. Eländpunktan oficialižen alusenpanendan voz' om 1922 kuti Pohjoine Pirkal (suom.: Pohjois-Pirkkala). Se sai lidnanvuiččen žilon (suom. kauppalaksi) oiktusid vl 1937. Udesnimitihe nügüdläižikš vl 1938. Ühtištadihe Suoniemi-kundanke vl 1973, Tottijärvi-kundanke vl 1976. Anttihe lidnan statusad vl 1977.

Nokia-lidn šingotase Nokian-kompanijan šintegimel, bumagantegimel, sodatransportan pästandal (Patria, Sisu) i «Nanso Group Oy»-kompanijan (päfater) tekstiližel tegimel.

Geografijan andmused

Lidn sijadase agjan suvipäivlaskmas, Pühäjärven suvipäivlaskmaižel randal (121 km², 77,2 m ü.m.t.) i läksijan sišpäi Nokianvirtanjogen oiktal randal tobjimalaz (kahesan kilometrad pitte, Kokemäenjogen bassein), se jokseb Kulovezi-järvhe (suom.: Kulovesi 36 km², 57,5 m ü.m.t.).

Matkad agjan Tampereh-keskushesai om 15 km päivnouzmha, Hel'sinkihesai om 180 km suvipäivnouzmha avtotedme vai raudtedme. Toine lähembaine lidn om Sastamal 35 km päivlaskmha-suvipäivlaskmha. «Tampereh — Pori»-raudtekeskust läbitab lidnad, sen kundan raudtestancijad oma Nokia i Siuro.

Lidnankundan ühthine pind om 347,84 km², sidä kesken ma — 288,31 km², sokaz tahond — 59,53 km² (vn 2022 andmused).

Tobmuz

Lidnankundan kart ende erigoittud kundoidenke (2022)

Lidnankund jagase 26 rajonaks (suom.: kaupunginosat). Nokian municipaline suim kogoneb 43 ezitajaspäi.

Eläjad

Vl 1980 kundan eläjiden lugu oli 23 644 ristitud, vl 2000 — 26 905 ristitud, vl 2010 — 31 647 ristitud, vl 2020 — 33 966 ristitud. Kaikiš suremb kundan ristitišt om nügüd'.

Eläjad mamankelen mödhe (2016): suomen kel' — 97,2 %, ročin kel' — 0,3 %, toižed keled — 2,5 %.

Galerei

• 
  Lidnan ohjastusen pert' (2009)
• 
  Nokian lüteranine jumalanpert', vn 2005 nägu (om saudud vl 1837)
• 
  Lidnan professionaline škol vl 2016
• 
  Lidnan jäpert'kulu (2011)
• 
  Nokia-raudtestancii vl 2014

Irdkosketused

• Lidnan ohjastusen sait (nokiankaupunki.fi). (suom.)