Loviis

Loviis (suom.: Loviisa [ˈloʋiːsɑ], roč.: Lovisa [luˈvǐːsɑ]) om Suomenman lidn da lidnankund valdkundan suvirandal. Mülüb Udenma-agjaha, sen kümnenz' lidnankund koumetoštkümnespäi eläjiden lugun mödhe.

Loviis
Loviisa (suom.)
Lovisa (roč.)

Lidnanznam	Flag
Valdkund	Suomenma
Eläjiden lugu (2024)	14,400 ristitud
Pind	1,751,52 km²
Pämez'	Tomas Björkrot (kezaku 2024—, Tomas Björkroth)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Eländpunktan aluz om pandud kuti Degerbü-lidnuz (roč.: Degerby) Venäman röunanno lidnan statusanke vl 1745, Rosen- i Ungern-čuhundused oma kaičenus. Ročinman Adol'f Frederik-kunigaz tuli lidnha i udesnimiti sidä nügüdläižikš vl 1752 ičeze Luiza Ul'rika Prussalaine-kunigaznaižen-akan ezmäižen nimen mödhe (roč.: Lovisa Ulrika av Preussen, valdoiči vll 1751−1771). Lidn sai torguindan laskendad verhidenke maidenke i šingotihe muga. Vl 1855 läz kaik vanh lidn paloi lophu. Vl 2010 mülütihe Pernai- (suom.: Pernaja), Lil'jendal- i Ruotsinpühtää-municipalitetoid lidnankundha.

Loviis šingotase Valko-torguindmeriportal (mec, pudotadud i pakuidud jügud) ani suvhe lidnaspäi, raudte ühtenzoitab Laht-lidnanke. Turizman kompanijad, pened torguindkeskused i mehanižed laukad oma olmas lidnas. Loviis-atomelektrostancii (Fortum-koncernan pala) radab vižtoštkümnes kilometras suvipäivnouzmha lidnaspäi Hästholmen-sarel.

Geografijan andmused

Lidn sijadase agjan päivnouzmaižes čogas, Baltijan meren randpolel, Suomen lahten Loviisan lahten randal.

Matkad agjan Hel'sinki-keskushesai om 77 km päivlaskmha-suvipäivlaskmha orhal vai 87 km avtotedme. Lähembaižed lidnad (avtotedme) oma Kotk (Kümenlakso) 40 km päivnouzmha i Porvoo 37 km päivlaskmha.

Vn 2022 andmusiden mödhe lidnankundan ühthine pind om 1751,52 km², sidä kesken kuiv ma 819,81 km², vezi i sokaz tahond ottas 25,83 km², meri — 905,88 km².

Tobmuz

Lidnankundan kart ende erigoittud kundoidenke (2023)

Loviisan municipaline suim kogoneb 35 ezitajaspäi.

Edeližed lidnan pämehed oma Jan Didrik Oker-Blom (tal'vku 2017 — tal'vku 2023), Olavi Kaleva (radoi vll 2001−2017).

Eläjad

Vl 1980 nügüdläižen lidnan territorijan eläjiden lugu oli 17 587 ristitud (se oli kaikiš suremb ristitišt), vl 2000 — 15 833 ristitud, vl 2010 — 15 595 ristitud, vl 2020 — 14 745 ristitud. Ristituiden pol' eläb lidnankundan keskuses.

Kodikelen mödhe (2016): suomen kel' — 54,9 %, ročin kel' — 41,3 %, toižed keled — 3,8 %.

Galerei

• 
  Lidnan tobmuden pert' (2015)
• 
  Loviisan jumalanpert', vn 2007 nägu (om saudud vl 1865)
• 
  Loviis-atomelektrostancii vl 2008
• 
  Loviisan avtostancii vl 2018

Irdkosketused

• Lidnan ohjastusen sait (loviisa.fi). (suom.) (roč.)