Jadrin

Jadrin (ven.: Я́дрин, čuv.: Етĕрне, nitmar.: Ядырна, mägimar.: Йӓдӹрнӓ) om Venäman lidn da lidnankund Čuvašijan Tazovaldkundan lodehes. Se om Jadrinan rajonan administrativine keskuz (vspäi 1927) da üks'jäine lidn.

Jadrin
Ядрин (ven.)
Етĕрне (čuv.)

Lidnanznam
Valdkund	Venäma
Eläjiden lugu (2021)	7,918 ristitud
Pind	54,71 km²
Pämez'	Vladislav Mihailov (sulaku 2017—)
Telefonkod	+7−83 547-xx-xxx
Avtokod	21, 121
Aigvö	UTC+3 (MSK+0)

Lidnan nägu Eläban Eziauguižen Stroican jumalanpertinnopäi (1829), vn 2018 nägu

Istorii

Eländpunktan aluz om pandud vl 1590 kuti varjoičendpost. Külä sai lidnan statusad vl 1781 oficialiženke Jadrinsk-nimitusenke, möhemba nimi lüheni nügüdläižeks.

Jadrinan ižandusen päsarakod oma sömtegimišt (spirttegim, maidon da lihan ümbriradmižen edheotandad), sauvondmaterialiden tehmine (savičun tegim), mugažo metallmašiništon tegim i omblendfabrik ratas. Lidn om maižanduzrajonan keskuseks.

Geografijan andmused

Lidn sijadase Sur-jogen hural randpolel, päivlaskmha jogen känmaspäi, 70 m ü.m.t. keskmäižel korktusel.

Matkad Čeboksarhasai om 60 km päivnouzmha orhal vai 77 km avtotedme. Lähembaine raudtestancii om Šumerl'-lidnas 59 km suvhe avtotedme.

Tobmuz

Jadrin om lidnankundan üks'jäižeks eländpunktaks.

Lidnankundan pämez' om sen Deputatoiden Nevondkundan ezimez'. Edeline lidnan pämez' om Irina Oblinova (reduku 2015 — 2017). Edeline lidnan Administracijan pämez' om Igor' Čečeneškin (kül'mku 2020 — kezaku 2022).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 614 ristitud, rajonan ristitišton koumandez, vn 2021 — 7 918 ristitud. Kaik 8 451 eläjad oli lidnas vl 2017. Kaikiš suremb lidnan ristitišt oli 11 tuhad eläjid vozil 1996−2001.

Rahvahad (enamba 0,4 % vl 2021): čuvašalaižed — 66,7 %, venälaižed — 31,1 %, marilaižed — 0,4 %, ukrainalaižed — 0,4 %, toižed rahvahad — 1,4 %.

Ortodoksižen hristanuskondan viž pühäpertid oma kaičenus i saudud lidnas, niišpäi Spasan Toižetamižen päjumalanpert' i Mikoi-arhangelan jumalanpert' oma kaičenus vaiše paloin i ei ole väges.

Lapsiden opendusen aluzkundad oma severz'-se päivkodid, kaks' keskškolad, gimnazii, čomamahtoiden škol, lapsiden sädamižen pert', sportškol. Jadrinan agrotehnine tehnikum om lidnan professionaližen opendusen aluzkundaks.

Transport

Avtobusad oma kundaližeks transportaks lidnas.

«Volg»-avtote (M7) om vides kilometras pohjoižhe lidnaspäi.

Irdkosketused

• Lidnankundan lehtpoled Čuvašijan Tazovaldkundan tobmuden aluzkundoiden oficialižel portalal (gov.cap.ru) (ven.)
• Lidnan informacine sait (yadrin.ru). (ven.)