Kozlovk

Kozlovk
Козловка (ven.)
Куславкка (čuv.)
Lidnanznam;	Flag;
Valdkund	Venäma
Eläjiden lugu (2021)	7,781 ristitud
Telefonkod	+7−83 534-xx-xxx
Avtokod	21, 121
Aigvö	UTC+3 (MSK+0)

Kozlovk (ven.: Козло́вка, čuv.: Куславкка) om Venäman lidn Čuvašijan Tazovaldkundan pohjoižpäivnouzmas. Se om Kozlovkan ümbrikon (edel vn 2023 vilukud — rajonan) administrativižeks keskuseks da palaks.

Istorii

Nügüdläižen lidnan territorijal kaikiš amuižemban eländpunktan aluz om pandud vl 1671 kuti Bogorodskoje-žilo (ven.: село Богородское, toine nimi — Vauged Voložk, sid' Belovolžskoje). Vl 1938 Kozlovk-žilo kändihe radnikžiloks. Vspäi 1959 Belovolžskoje-žilo mülüb Kozlovkha, i vspäi 1965 ližatihe koume küläd (Komarovk, Alakäp, Slabad — Комаровка, Нижний Курган, Слобода). Vn 1967 20. päiväl kül'mkud Kozlovk sai lidnan statusad.

Kozlovkan ižandusen päsarak om mašinansauvomine (furgonad jüguavtoiden täht, plazmleiktandan portaližed tömašinad), mugažo kalanümbriradmižen edheotand i omblendfabrik ratas lidnas. Ende leibänkombinat i metalltegesiden tegim radoiba mugažo.

Geografijan andmused

Lidn sijadase Volgan oiktal randal (Čeboksaran vezivaradim), 70 m ü.m.t. keskmäižel korktusel.

Jogivaldmad da ehtatuz Volgas päliči ratas lidnas. Matkad Čeboksarhasai om 97 km lodeheze avtotedme. Marii Elan Tazovaldkundan Volžsk-lidn seižub vastrandal koumes kilometras pohjoižpäivnouzmha.

Tobmuz

Vll 2004−2022 Kozlovkan lidnankund oli olmas, ümbrikon territorialine palakund om sätud sen sijas vspäi 2023. Kaik koume pen't küläd mülüiba lidnankundha Kozlovkan ližaks. Lidnankundan pind oli 50,76 km².

Lidnankundan Deputatoiden suim om tühjitadud vn 2023 tal'vkus, Tamara Petrova radoi sen likvidacižen laudkundan ezimehen vn 2022 redukuspäi. Jäl'gmäine lidnankundan pämez' (Deputatoiden suiman ezimez') oli Lübov' Osipova (reduku 2020 — reduku 2022), edeline — Aleksandr Gofman (2011−2015). Lidnan Administracii om likvidiruidud vn 2023 tal'vkule, jäl'gmäine pämez' oli Andrei Pocelujev vn 2021 kezakuspäi, hän-žo radoi sen likvidacižen laudkundan ezimehen vn 2022 kül'mkuspäi. Edeližed lidnan Administracijan pämehed oliba Eduard Aleksandrov (reduku 2020 — kezaku 2021), Pötr Jegorov (heinku 2017 — kezaku 2020).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 10 359 ristitud, vn 2021 — 7 781 ristitud. Vl 2017 kaik 9 058 ristitud elihe lidnas i 9 239 ristitud kaikes lidnankundas. Kaikiš suremb lidnan ristitišt oli enamba 13 tuhad eläjid vozil 1992−1998 i 2002−2003 (13 300 rist. vl 1996).

Ortodoksižen hristanuskondan Kazanin Jumalanmaman jumalanpert'^[1] om udessaudud lidnas vll 1990−2005.

Lapsiden opendusen aluzkundad oma severz'-se päivkodid, kaks' keskškolad (nomer 2 i 3), čomamahtoiden škol (ende muzikškol i čomamahtoine škol eriži), Atal-sportškol. Aluzškol nomer 1 om likvidiruidud vl 2018. Kozlovkan äiprofil'ne agrarine kolledž^[2] om lidnan professionaližen opendusen aluzkundaks.

Galerei

Kozlovkan rajonan käskuzkund (2006, ende Volčkov-torgovanan pert')
Volgan nägu lidnas (2009)
Socialižen sferan aluzkundad pertištos vn 2014 vilukus
Lobačevskii-matematikantedomehen muzei hänen enččen usadiban ühtes pertišpäi (2015)