Hamin

Hamin (suom.: Hamina [ˈhɑminɑ], roč.: Fredrikshamn [freːdrɪks¹hamːn]) om Suomenman lidnankund, lidn da järed meriport Kümenlakso-provincijas. Se om valdkundan 56nz' lidn eläjiden lugun mödhe.

Hamin
Hamina (suom.)
Fredrikshamn (roč.)

Lidnanznam	Flag
Valdkund	Suomenma
Eläjiden lugu (2024)	19,413 ristitud
Pind	1,155,15 km²
Pämez'	Ilari Soosalu (keväz'ku 2023—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Vehkalahti-külä mainitihe vspäi 1336. Vl 1653 se sai lidnan statusad Uz' Vehkalahti-nimitusenke, lugetas sidä vot eländpunktan oficialižen alusenpanendan vodeks. Vspäi 1723 udesnimitihe lidnad ročin kelel Fredrikshamn:aks («Fredrikan merikar») Ročinman uden Fredrik I-kunigahan nimen mödhe. Oli röunmalidnuseks i Ročinman palaks vhesai 1743. Vn 1821 luja lämoipalo polti lidnan ühesa kümnendest. Vl 1960 saudihe kivivoinvalamižportad, portan jüguiden mülü ületi 5 mln tonnoid vl 1988. Ende bumagantegim radoi lidnas. Vl 2003 ühtištadihe Vehkalahti-kundanke.

Hamin šingotase turizmal i Google-kompanijan datakeskusil vspäi 2009 (Evropan üks' videspäi). Järed jügumeriport radab lidnas, se om ühtenzoittud lähižen Kotk-lidnan meriportanke.

Geografijan andmused

Lidn sijadase agjan i valdkundan suvipäivnouzmas, Suomen lahten pohjoižrandal.

Matkad Hel'sinkihesai om 145 km päivlaskmha avtotedme vai raudtedme, Venäman röunhasai — 40 km päivnouzmha orhal. Lähembaižed lidnad oma Kouvol 50 km pohjoižhe i Kotk 15 km suvipäivlaskmha.

Vn 2022 andmusiden mödhe lidnankundan pind om 1 155,15 km², sidä kesken kuiv ma 609,94 km², sokaz tahond — 23,77 km², meri otab 521,44 nellikkilometrad.

Tobmuz

Haminan municipaline suim kogoneb 43 ezitajaspäi.

Edeline lidnan pämez' om Hannu Muhonen (2004 — keväz'ku 2023).

Eläjad

Vl 1980 lidnankundan eläjiden lugu oli 22 995 ristitud (kaikiš suremb), vl 2000 — 21 847 ristitud, vl 2010 — 21 400 ristitud, vl 2020 — 19 877 ristitud. Vspäi 1975 kaikiš suremb kundan ristitišt oli 23 298 eläjad vl 1975.

Eläjad mamankelen mödhe (2016): suomen kel' — 93,9 %, ročin kel' — 0,4 %, toižed keled — 5,7 %.

Galerei

• 
  Lidnan ohjandusen sauvuz (2005)
• 
  Ph. Joannan jumalanpert' (lüteranižuz, 1843), vn 2007 nägu
• 
  Suvižen Kümenlakson professionaližen kolledžan kampus, Hamin (2019)
• 
  Haminan jäpert'kulu (2023)
• 
  Lidnan muzei (2012)

Irdkosketused

• Lidnan ohjastusen sait (hamina.fi). (suom.) (angl.)