Forss

Forss (suom. i roč.: Forssa) om Suomenman lidn valdkundan suvipäivlaskmas, sen Kanta-Häme-provincijas. Hämen sättutoitud tedoiden universitet sijadase lidnan keskuzpalas.

Forss
Forssa (suom. i roč.)

Lidnanznam
Valdkund	Suomenma
Eläjiden lugu (2020-01-01)	16,906 ristitud
Pind	253,36 km²
Pämez'	Jari Kesäniemi (sulaku 2017—)
Telefonkod	+358-(0)3
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Vl 1846 ročilaine Aksel' Vil'gel'm Vahren (suom.: Axel Wilhelm Wahren) pani fabrikan alust ümbriradmaha puvillad Loimijogen (suom. Loimijoki) randal. Eländpunktan aluz om pandud vl 1923 kuti kund, se sai lidnan statusad vl 1964.

Forss šingotase municipalitetan holitišiden aluzkundoil, sömtegimištol, sauvondmaterialiden tehmižel (beton, lämuzizoläcii) i elektronikan edheotandal.

Geografijan andmused

Lidn sijadase Loimijogen randoil (suom.: Loimijoki 114 km pitte, Kokemäenjogen hura ližajogi). Sured lidnad oma läheli: matkad Hämenlidnhasai om 56 km pohjoižpäivnouzmha, Hel'sinkin keskushesai — 110 km suvipäivnouzmha, Turkuhusai — 88 km suvipäivlaskmha, Tamperehesai — 87 km pohjoižhe.

Vn 2022 andmusiden mödhe lidnankundan pind om 253,36 km², sidä kesken kuivma — 248,83 km², vezi i sokaz tahond ottas 4,53 km².

Tobmuz

Forss jagase kahteks administrativižeks lidnanlaptaks, ned alajagasoiš 17 valičemižümbrikoks. Forssan municipaline suim kogoneb 43 ezitajaspäi.

Edeližed lidnan pämehed oma Sami Sulkko (2013−2017), Tapani Venho (2002–2013), Hannu Joensivu (1999–2001).

Eläjad

Vl 1980 lidnankundan eläjiden lugu oli 19 332 ristitud, vl 2000 — 18 506 ristitud, vl 2010 — 17 904 ristitud, vl 2020 — 16 906 ristitud. Kaikiš suremb lidnan ristitišt oli 19 660 eläjad vl 1990.

Mamankelen mödhe (2016): suomen kel' — 95,2 %, ročin kel' — 0,3 %, toižed keled — 4,5 %.

Galerei

• 
  Lidnan ohjastusen pert' (2010)
• 
  Forssan jumalanpert', vn 2014 nägu
• 
  Ankkalammi-puišt («sorzanuitod») lidnan keskuzpalas vl 2006
• 
  Forssan üläopendusen licei (2008)
• 
  Teatran sauvuz vl 2012

Irdkosketused

• Lidnan ohjastusen sait (forssa.fi). (suom.) (angl.) (roč.) (ven.)