Bariš (lidn)

Bariš (ven.: Бары́ш) om Venäman lidn da lidnankund Ul'janovskan agjan päivlaskmas. Se om Barišan rajonan administrativine keskuz.

Bariš
Барыш

Lidnanznam	Flag
Valdkund	Venäma
Eläjiden lugu (2021)	14,924 ristitud
Pind	13,76 km²
Pämez'	Jevgenii Jermolajev (viluku 2006—)
Telefonkod	+7−84 253-xx-xxx
Avtokod	73, 173
Aigvö	UTC+4 (MSK+1)

Istorii

Eländpunktan aluz om pandud vl 1925 kahten žilon ühtištusel: Troickoje-Kurse-külä da Marjinan bumagfabrikan radnikžilo. Nimitihe raudtestancijan mödhe, radab vspäi 1898. Vn 1954 22. päiväl tal'vkud ühtištadihe Bariš-radnikžilod Gurjevkan vatefabrikan radnikžilonke da anttihe lidnan statusad. Vozil 1975−2008 lidn oli alištunu agjan tobmudele oikti.

Barišan ižandusen päsarakod oma sauvondmaterialiden tegimed (katuzmaterialad, asfal't), tekstil'tegimišt omblendfabrikanke, sömtegimišt (lindferm i Rosrezerv:an lihategim), mugažo mebel'fabrik radab. Ende jauhontegim i bumagan fabrik radoiba mugažo.

Geografijan andmused

Lidn sijadase Volgaveren ülüdel, 200 m ü.m.t. keskmäižel korktusel, seižub Bariš-jogen oiktal randal (Suran oiged ližajogi, Volgan bassein).

Matkad Ul'janovskhasai om 139 km pohjoižpäivnouzmha avtol. Lähembaine lidn om Inz 65 km lodeheze avtotedme vai raudtedme.

Tobmuz

Bariš om lidnankundan üks'jäižeks eländpunktaks.

Lidnankundan tobmuden pämez' om sen Deputatoiden nevondkundan ezimez'. Lidnankundan erigoittud Administracii om likvidiruidud vn 2014 sügüz'kus, rajonan administracii tegeb sen velgusidme.

Eläjad

Vl 1959 lidnan eläjiden lugu oli 17 909 ristitud. Vn 2010 Venäman rahvahanlugemižen mödhe 17 149 ristitud elihe lidnas, rajonan nell' ühesandest, vn 2021 — 14 924 ristitud. Kaik 16 147 eläjad oli lidnas vl 2017. Kaikiš suremb lidnan ristitišt oli 21 900 eläjad vl 1996.

Ortodoksižen hristanuskondan koume pühäpertid oma kaičenus i saudud lidnas: Eläban Eziauguižen Stroican kafedraline päjumalanpert' lidnan keskuzpalas vspäi 1754 i kaks' jumalanpertid.

Lapsiden opendusen aluzkundad oma kuz' nimitadud i nomeruidud päivkodid, nell' keskškolad (nomer 1..4), lapsiden sädamižen pert', čomamahtoiden škol, lapsiden da norišton sportškol. Kaks' specialižen keskopendusen aluzkundad oma avaitud: Barišan industrialiž-tehnologine tehnikum i Barišan kolledž — Ul'janovskan ekonomikan da oiktusen tehnikuman filial.

Transport

Bariš-raudtestancii radab «Saransk — Sizran'»-jonol.

«Ul'janovsk — Inz»-avtote (suvine) läbitab lidnad päivnouzmaspäi lodeheze.

Irdkosketused

• Lidnankundan i Barišan rajonan tobmuden sait (barysh.gosuslugi.ru). (ven.)