Novoul'janovsk

Novoul'janovsk (ven.: Новоулья́новск) om Venäman lidn da lidnümbrik Ul'janovskan agjan keskuzpalas.

Novoul'janovsk
Новоульяновск

Lidnanznam	Flag
Valdkund	Venäma
Eläjiden lugu (2021)	13,673 ristitud
Pind	9,36 km²
Pämez'	Gennadii Denikaev (kül'mku 2012—)
Telefonkod	+7−84 255-xx-xxx
Avtokod	73, 173
Aigvö	UTC+4 (MSK+1)

Novoul'janovskan lidnümbrik agjan kartal (2009)

Istorii

Kremenki-žilon aluz oli pandud kuti Simbirskan varjoičendpunkt. Vl 1956 nevondkundaline tobmuz päti sauda cementantegint sijaližel torhudel läz Kremenki-žilod, zavottihe avto- da raudteišpäi, kävutihe türmatud mehiden töid sauvomha tegint.

Nügüdläižen eländpunktan aluz om pandud oficialižikš vl 1957, se kändihe Novoul'janovsk-radnikžiloks vl 1961, lidnaks vn 1967 11. päiväl semendkud. Vspäi 1981 Kremenki-žilo mülüb lidnha. Vn 2003 redukuspäi erigottihe Novoul'janovskad ümbrištonke Ul'janovskan rajonaspäi, kätihe municipaližeks ühtnikaks agjan alištusenke.

Novoul'janovsk šingotase sauvondmaterialiden tehmižel: cementantegim, asbestiž-cementižed tegesed, raudbetonkonstrukcijad, pehmdad katuzmaterialad. Laivansauvomižen da kohendusen tegim radab Kriuši-žilos.

Geografijan andmused

Lidn sijadase Volgan oiktal randal (Kuibiševan vezivaradim), 100 m ü.m.t. keskmäižel korktusel. Om Ul'janovskan suvižeks kaimdailidnaks kümnes kilometras sen röunaspäi.

Tobmuz

Kaik viž žilod, sidä kesken järed Kriuši-žilo (2 699 rist. vl 2010), mülüdas lidnümbrikho Novoul'janovskan ližaks. Lidnümbrikon pind — 253,67 km².

Lidnümbrikon tobmuden pämez' om sen Duman ezimez'. Lidnümbrikon Administracijan pämez' om Sergei Il'jüškin vn 2023 elokuspäi. Edeline Administracijan pämez' om Svetlana Kosarinova (kül'mku 2012 — heinku 2023).

Eläjad

Vn 2010 Venäman rahvahanlugemižen mödhe lidnan eläjiden lugu oli 16 033 ristitud, lidnümbrikon — 20 333 ristitud. Vn 2021 rahvahanlugemižen mödhe lidnan ristitišt oli 13 673 eläjad. Vl 2017 kaik 14 164 ristitud elihe lidnas i 18 140 ristitud kaikes lidnümbrikos. Kaikiš suremb lidnan ristitišt oli enamba 17 tuhad eläjid vll 1996−2005 (18 000 rist. vl 1998).

Ortodoksižen hristanuskondan Eläban Eziauguižen Stroican jumalanpert' om letud vll 2002−2014.

Lapsiden opendusen aluzkundad oma severz'-se päivkodid, kaks' keskškolad (nomer 1 i 2), lapsiden sädamižen pert', čomamahtoiden škol, «Cementnik»-sportškol. Ul'janovskan lidnansauvomižen da oiktusen kolledžan (ende sauvondkolledž) filial om lidnan professionaližen opendusen aluzkundaks.

Irdkosketused

• Municipaližen «Novoul'janovsk-lidn»-ühtnikan tobmuden sait (novulsk.gosuslugi.ru). (ven.)