Inz

Inz (ven.: И́нза, erz.: Инзей ош) om Venäman lidn da lidnankund Ul'janovskan agjan päivlaskmas. Se om Inzan rajonan administrativine keskuz.

Inz
Инза

Lidnanznam
Valdkund	Venäma
Eläjiden lugu (2021)	17,016 ristitud
Pämez'	Viktorija Caröva (reduku 2020—)
Telefonkod	+7−84 241-xx-xxx
Avtokod	73, 173
Aigvö	UTC+4 (MSK+1)

Istorii

Eländpunktan aluz om pandud vl 1897 kuti raudtestancii da žilo senno, nimitihe jogen mödhe. Žilo kändihe rajonkeskuseks vl 1929.

Inz sai lidnan statusad vl 1946, ühtištuihe lähiženke Kitovk-žilonke (ven.: Китовка, vspäi 1678). Lidn šingotase raudten edheotandoil, diatomitan samižel, sauvondmaterialiden tehmižel (meckombinat, punümbriradai tegim, kuidmaterialad), mugažo lihakombinat radab.

Geografijan andmused

Lidn sijadase 100 m ü.m.t. keskmäižel korktusel. Matkad Ul'janovskhasai om 167 km pohjoižpäivnouzmha orhal. Lähembaine lidn om Nikol'sk (Penzan agj) 24 km suvipäivlaskmha orhal vai 51 km avtotedme.

Troickoje-žilo (263 rist. vl 2010) i Dubenki-külä (49 rist. vl 2010) mülüdas lidnankundha Inzan ližaks. Lidnankundan pind — 48,01 km². Rajonan administracii tegeb lidnankundan administracijan velgusidme vspäi 2016.

Eläjad

Vn 2010 Venäman rahvahanlugemižen mödhe lidnan eläjiden lugu oli 18 803 ristitud, lidnankundan — 19 115 ristitud, rajonan koume videndest. Kaikiš suremb lidnan ristitišt oli 25 200 eläjad vl 1996. Vl 2017 kaik 17 714 ristitud elihe lidnas i 17 989 ristitud kaikes lidnankundas.

Rahvahad (enamba 0,4%, ristitišt 17 705 eläjad, ozutadud rahvahudenke): venälaižed — 86,0%, mordvinalaižed — 9,5%, totarlaižed — 3,0%, toižed rahvahad — 1,5%.

Ortodoksižen hristanuskondan viž pühäpertid oma olmas lidnas: Jumalanmaman Sündundan päjumalanpert' (om letud vll 2013−2019), koume jumalanpertid i časoun'.

Inzan saraktehnologijoiden, ekonomikan da oiktusen valdkundaline tehnikum om professionaližen opendusen aluzkundaks.

Edeline lidnan pämez' (Deputatoiden Nevondkundan ezimez') oli Sergei Rautkin (vn 2009 redukuspäi, eli 1960−2022).

Galerei

• 
  Puruvedim-muštnik (2019, om seižutadud vl 2010)
• 
  Avtobusstancii vl 2012
• 
  Inz-päraudtestancijan sauvused vl 2010

Irdkosketused

• Lidnankundan Ezitajiden Nevondkund Inzan da sen rajonan tobmuden aluzkundoiden oficialižel saital (inza.ulregion.ru). (ven.)