Volžsk

Volžsk (ven.: Волжск, mugažo totaran kelel, mägimar. i nitmar.: Юлсер-Ола) om Venäman lidn da lidnümbrik Marii Elan Tazovaldkundan kaikiš suvižembas čokkoimes. Se om Volžskan rajonan administrativine keskuz mugažo, ei mülü rajonha.

Volžsk
Волжск (ven.)
Юлсер-Ола (mägimar. i nitmar.)

Lidnanznam	Flag
Valdkund	Venäma
Eläjiden lugu (2021)	52,703 ristitud
Pind	39,47 km²
Pämez'	Tat'jana Binina (tal'vku 2021—, Татьяна Бынина)
Telefonkod	+7−83 631-xx-xxx
Avtokod	12
Aigvö	UTC+3 (MSK+0)

Lidnan ühthine nägu lendimespäi (2013)

Istorii

Eziauguine eländpunkt oli Lopatino-külä, mainitase 19. voz'sadaspäi. Nügüdläižen eländpunktan aluz om pandud vl 1938 Lopatino-žiloks sauvomha cellülozbumagašt kombinatad. Se sai lidnan statusad Volžsk-nimenke vl 1940.

Volžskan ižandusen päsarakod oma cellülozbumagaine, mašiništonsauvomine (vilugoitimed), sauvondmaterialiden (gazbeton), meblin tehmine. Nevondkundaližen aigan pästtihe magnitofonid-ki.

Geografijan andmused

Lidn seižub Volg-jogen hural randal, 60 m keskmäižel korktusel valdmeren pindan päl. Matkad Joškar-Olhasai om 97 km pohjoižhe avtotedme. Lähembaižed lidnad oma Tatarstanan Zelenodol'sk 10 km päivnouzmha avtotedme, Kazan' 49 km päivnouzmha avtotedme, Innopolis 28 km suvipäivnouzmha avtotedme, Čuvašijan Kozlovk 3 km suvipäivlaskmha orhal (Volgan vastrandal), Novočeboksarsk 60 km päivlaskmha avtotedme.

Volžsk om lidnümbrikon üks'jäine eländpunkt. Kaik ühesa lidnanlaptad, kaks' tegimištrajonad i koume žilod oma lidnan territorialižikš paloikš.

Eläjad

Vn 2010 kaiken Venäman rahvahanlugemižen mödhe eläjiden lugu oli 55 659 ristitud. Kaikiš suremb ristitišt oli enamba 60 tuhad eläjid vozil 1987−2001 (62,5 tuh. ristitud vl 1992).

Rahvahad (enamba 0,4% vl 2010): venälaižed — 67,9%, marilaižed — 13,5%, totarlaižed — 13,2%, čuvašalaižed — 1,6%, ukrainalaižed — 0,5%, mordvinalaižed — 0,4%, toižed rahvahad — 1,1%, rahvahuden ozutandata — 1,8%.

Professionaližen opendusen aluzkundad: Volžskan industrialiž-tehnologine tehnikum, Sauvomiž-tegimištoline kolledž, Joškar-Olan medškolan filial, üläopendusen aluzkundoiden nell' filialad.

Nadežda Len'kova radoi lidnümbrikon pämehen (Deputatoiden nevondkundan ezimez') hätken aigan, vn 2006 vilukuspäi vn 2019 redukuhusai.

Lidnümbrikon Administracijan pämez' om Rafis Šagvaleev vn 2022 uhokuspäi.

Transport

Avtobusad da maršruttaksid oma kundaližeks transportaks lidnas. Avtobusad da ezilidnelektrojonused ühtenzoittas Kazaninke, Volžsk-raudtestancii om olmas vspäi 1940.

Kaks' valdmad om Volgan randal.

Galerei

• 
  Ph. Mikulai-čudonsädajan kafedraline päjumalanpert', vn 2016 nägu
• 
  Islaman pühäpert', vn 2016 nägu
• 
  Marin CBK (Marbumkombinat) vl 2016
• 
  Marin CBK:n kul'turkeskuz (2016)
• 
  Volžsk-raudtestancii vl 2016

Irdkosketused

• Lidnümbrikon tobmuden lehtpoled mari-el.gov.ru-saital. (ven.)