Sretensk

Sretensk (ven.: Сре́тенск) om Venäman lidn da lidnankund Baikalantagaižen randan keskuzpalan pohjoižpäivnouzmas. Se om Sretenskan rajonan administrativine keskuz.

Sretensk
Сретенск

Lidnanznam	Flag
Valdkund	Venäma
Eläjiden lugu (2021)	6,353 ristitud
Pämez'	Roman Bogdanov (2014—)
Telefonkod	+7−30 246-xx-xxx
Avtokod	75, 80
Aigvö	UTC+9 (MSK+6)

Istorii

Eländpunktan aluz om pandud vl 1689 kuti Stretenskii varmitez (ven.: Стретенский острог), sid' oli tetab kuti Stretensk — kaivuzžilo, kozakoiden stanic. Vhesai 1912 Sretenskan raudtestancii oli Transsiban lopstancijaks, edemba kormazihe jüguid jogilaivoihe da toihe Amuradme. Vl 1926 Sretensk sai lidnan statusad da kändihe rajonan keskuseks.

Sretensk šingotase laivansauvomižen tegimel (pened jogilaivad, meblin tehmine). Raudtestancii om Transsiban 50-kilometrižen sarakon lopstancii Kueng-stancijaspäi.

Geografijan andmused

Lidn sijadase Šilk-jogen molembil randoil, 490 m ü.m.t. keskmäižel korktusel. Matkad Čithasai om 365 km päivlaskmha. Lähembaine lidn om Nerčinsk 100 km päivlaskmha.

Klimat om terav kontinentaline mussonižpirdoidenke. Voden keskmäine lämuz — −2,9 C° vilun tal'ven tagut, kezakun-elokun +16..+19 C°, tal'vkun-uhokun −24..−29 C°. Ekstremumad oma −50,7 C° i +41,3 C°. Paneb sadegid 357 mm vodes, kezal tobjimalaz (98 mm heinkus i 83 mm elokus), i vaiše 52 mm redukus-sulakus.

Morgul-külä (ven.: Моргул, 44 rist. vl 2017) mülüb lidnankundha Sretenskan ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 850 ristitud, lidnankundan — 6 895 ristitud, rajonan koume kümnendest. Kaikiš suremb lidnan ristitišt oli 15 138 eläjad vl 1959.

Ortodoksižen hristanuskondan üks'jäine radai ph. Jurgii-vägestusenkandajan jumalanpert' (saudihe vl 1890) om kaičenus lidnas videspäi, Mikoi-arhangelan jumalanpertin sauvuz kävutase toižin.

Sretenskan pedagogine kolledž om lidnan professionaližen opendusen aluzkundaks.

Galerei

• 
  Sretenskan rajonan tobmuden sauvuz (2021, ende bank)
• 
  Sretenskan rajonan tobmuden toine sauvuz (2021, ende Edel'šteinan pert')
• 
  Adivpert' i söndtavaroiden lauk (2021, ende Šustovan usadib)
• 
  Puine eländpert' randirdal (istorine muštnik), vn 2021 nägu

Irdkosketused

• Lidnankundan tobmuden oficialine sait (сретенскадм.рф). (ven.)