Slupsk

Slupsk (pol'š.: Słupsk [swupsk], edel 1945. vot oficialine nimi oli Štol'p , saks.: Stolp) om lidn Pol'šanman pohjoižes, mülüb Pomorjen sodaveikundha.

Slupsk
Słupsk

Lidnanznam	Flag
Valdkund	Pol'šanma
Eläjiden lugu (2018)	91,935 ristitud
Pind	43,15 km²
Pämez'	Kristina Danilecka-Vojevodzka (kül'mku 2018—)
Telefonkod	+48−59
Aigvö	tal'vel UTC+1, kezal UTC+2

Lidnan kart (2015)

Istorii

Eländpunkt mainitase ezmäižel kerdal 10. voz'sadal. Se om lidnan oiktusidenke vozišpäi 1265 da 1310, konz sirtihe lidnad udhe sijha. Amerikaižen raketanvastaižen kompleksan sauvomine tuli lophu vodele 2018 viden kilometras päivnouzmha Slupskaspäi Redzikovo-žilos.

Slupsk šingotase Scania-avtobusoiden tehmižel, sobiden da kengiden pästandal, turizmal (14.-15. voz'sadoiden sauvused).

Geografijan andmused

Lidn sijadase Slup'-jogen randoil (pol'š.: Słupia), 18 kilometras Baltijan meren randaspäi, 22 m ü.m.t. keskmäižel korktusel. Läz 20 vezištod lidnan territorijal oma Slupin johtad. Slupskan avanport om pen' Ustk-lidn (pol'š. Ustka). Lähembaižed sured lidnad da järedad meriportad oma Gdin' da Gdan'sk sadas kilometras päivnouzmha.

Klimat om ven meren. Voden keskmäine lämuz om +7 C°. Paneb sadegid 660 mm vodes.

Slupskan 13 lidnrajonad (2011)

Eläjad

Vl 2014 lidnan eläjiden lugu oli 93 706 ristitud. Kaikiš suremb lidnan ristitišt oli 102 832 eläjad vl 1994. Vn 1939 eläjiden lugu (50 373 rist.) ületi vodele 1960.

Üläopendusen nell' aluzkundad ratas lidnas. Pomorjen universitet Slupskas (edel vn 2023 kezakud Pomorjen akademii, 3,5 tuh. üläopenikoid vn 2023 lopus) baziruiše lidnas, sen alusenpanend tegihe vl 1969 kut pedagogine tehnikum vn 1957 pedkolkedžaspäi, oli akademijaks vspäi 2000. Toižed aluzkundad oma Ganzan administracijan üläškol, Ižandusen inženerijan üläškol, Varšavan Tehnikan da ekonomikan üläškolan informatikan da keliden keskuz.

Irdkosketused

• Lidnan ohjastusen oficialine sait (slupsk.pl). (pol'š.) (+avtomatine känduz anglijan i ukrainan kelihe)