Sent Pol (lidn, Minnesot, AÜV)

Sent Pol (angl.: Saint Paul [ˌseɪnt ˈpɔːl], lüh. angl. St. Paul) om AÜV:oiden lidn, Minnesot-štatan pälidn sen alusenpanendan aigaspäi (kuti territorii — vspäi 1849), sen kahtenz' surtte lidn. Lidn om konurbacijas Minneapolisanke, ned ühtes oma tetabad kuti «kaks'jäižed-lidnad» (angl. Twin cities). niiden aglomeracii otab kudendentoštkümnenden sijan AÜV:oiš ristitišton lugun mödhe (3,4 mln vl 2014).

Sent Pol
Saint Paul

Lidnanznam	Flag
Valdkund	Amerikan Ühtenzoittud Valdkundad
Eläjiden lugu (2014)	297,640 ristitud
Pind	145,51 km²
Pämez'	Kris Koulmen (2006—)
Telefonkod	+1−651
Aigvö	tal'vel UTC−6, kezal UTC−5

Lidn om punümbriradmižen da himižen tegimišton keskuz, mugažo järedan maižanduzrajonan keskuz.

Istorii

Vl 1805 amerikaižen armijan Zebulon Paik-oficer osti tarh 400 km² pindal indejalaižil Mississipi-jogen molembil randoil sauvomha fortad. Vl 1819 Snelling-lidnuz oli saudud. Sid' pagenijad Francižes Kanadaspäi zavottihe sirtas sihe. Vl 1841 Lüsjen Gal'ter-pap' Kvebekaspäi sauvoi časounäd Ph. Pauloin nimel nimitadud. Časounän mödhe žilod udesnimitihe-ki. Sent Pol-žilo sai lidnan oficiališt statusad vl 1854 keväz'kun 4. päiväl, sil-žo vodel kapitolii oli saudud.

1860-nzil vozil Sent Pol oli röunaks civilizuidud Amerikan Päivnouzman da Mecpäivlaskmpolen keskes.

Geografijan andmused

Sent Pol sijadase štatan päivnouzmas. Se om štatan kahtenz' surtte lidn. Minnesotan kaikiš suremb Minneapolis-lidn sijadase päivlaskmpolehe pälidnaspäi.

Lidn seižub jogiden da järviden keskes 214 metrad keskmäižel korktusel, sijadase Mississipi-jogen hural randal, sen ühthejoksmusel Minnesot-jogenke.

Klimat om kontinentaline. Kaks'jäižid-lidnoiden aglomeracii om kaikiš vilumb sija AÜV:oiden aglomeracijoiden keskes enamba mi 500 tuh. eläjidenke. Vodenkeskeine lämuz om +7,6°C. Vilukun kesklämuz om -9°C, heinkun — +23°C. Paneb sadegid 827 mm vodes. Tal'v om kuiv (72 mm), keza om vihmakaz (350 mm).

Sent Pol alajagase 17 administrativižhe ümbrikho (angl. planning district), vai 15 istorižhe lidnanlaptha (angl. neighborhood).

Ižanduz

3M- da Ecolab-mail'mkompanijoiden päfaterad sijadase lidnas.

Transport

Avtobusad da kiruhlidnelektrojonused oma kundaližeks transportaks lidnan südäimes.

Rahvahidenkeskeine soda- da civiline «Minneapolis/Sent Pol»-lendimport (MSP) sijadase 16 kilometras suvipäivlaskmha lidnan keskusespäi. Sišpäi tehtas reisid Kanadha, Meksikha, Japonijha da Paivlaskmaižen Evropan maihe, mugažo AÜV:oiden südäimes.

Irdkosketused

• Sent Pol-lidnan ohjastusen oficialine portal (stpaul.gov). (angl.) (isp.)