Orimattil

Orimattil (suom. i roč.: Orimattila, suomen virkand: [ˈoriˌmɑtːilɑ]) om Suomenman lidn valdkundan suves. Mülüb Päijät-Häme-agjaha, sen kaikiš penemb lidn koumespäi eläjiden lugun mödhe.

Orimattil
Orimattila (suom. i roč.)

Lidnanznam
Valdkund	Suomenma
Eläjiden lugu (2024)	15,649 ristitud
Pind	814,01 km²
Pämez'	Kalle Larsson (semendku 2022—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Orimattilan tulend om olmas vspäi 1636. Šingotihe tekstil'tegimištol 19. voz'sadaspäi, mujutihe villad. Municipalitetan aluz om pandud vl 1865. Se sai lidnan statusad vl 1992. Artjärvi-küläkund om mülütadud lidnankundha vl 2011.

Orimattil šingotase metallurgijan «Orima»-kompanijal, kaivuzmašiništon kompanijal (Allu Group) i plastiktegesiden pästandal sauvondan täht (Kera Group). Villfabrik radoi vhesai 2012.

Geografijan andmused

Lidn sijadase agjan suviröunanno, Palojogen randoil (suom.: Palojoki).

Matkad agjan Laht-keskushesai (se-žo lähembaine lidn) om kaks'kümne kilometrad pohjoižhe kaikil teil, Hel'sinkin keskuzpalahasai om 83 km suvipäivlaskmha orhal, 93 km avtotedme vai raudtel.

Vn 2022 andmusiden mödhe lidnankundan ühthine pind om 814,01 km², sidä kesken kuiv ma — 785,26 nellikkilometrad, vezi da sokaz tahond ottas 3,5 procentad (28,75 km²).

Tobmuz

Lidnankundan kart ende erigoittud kundoidenke (2024)

Orimattilan municipaline suim kogoneb 33 ezitajaspäi.

Edeližed lidnan pämehed oma Osmo Pieski (2011 — uhoku 2022), Martti Heinonen (radoi vn 2010 elokuhusai).

Eläjad

Vl 1980 lidnankundan eläjiden lugu oli 15 184 ristitud, vl 2000 — 15 629 ristitud, vl 2010 — 16 309 ristitud, vl 2020 — 16 005 ristitud. Kaikiš suremb kundan ristitišt oli 16 326 eläjad vl 2015. Lidnankundan ristituiden koume videndest elädas territorijan keskuses.

Mamankelen mödhe (2016): suomen kel' — 97,0 %, ročin kel' — 0,6 %, toižed keled — 2,4 %.

Galerei

• 
  «Villa roosa»-kuvagalerei (2013)
• 
  Orimattilan lüteranine jumalanpert', vn 2006 nägu (om saudud vll 1862−1866)
• 
  Enččen «Virke Oy»-kompanijan villfabrik >(«Finnkarelia Virke», 2011)
• 
  Hennan raudtestancii vn 2017 tal'vkus

Irdkosketused

• Lidnan oficialine sait (orimattila.fi). (suom.)