Olomouc

Olomouc (mugažo čehan kelel, virkand [ˈɔlɔmɔŭts], sijaline Holomóc vai Olomóc; saks.: Olmütz) om Čehanman kudenz' surtte lidn eläjiden lugun mödhe. Se om Olomoucan randan administrativine keskuz.

Olomouc

Lidnanznam	Flag
Valdkund	Čehanma
Eläjiden lugu (2018)	100,494 ristitud
Pind	103,36 km²
Pämez'	Miroslav Žbanek (reduku 2018—)
Telefonkod	+420−585
Avtokod	M
Aigvö	tal'vel UTC+1, kezal UTC+2

Lidnan kart (2021)

Istorii

Lidn oli Suren Moravijan valdkundan keskuseks 9.-10. voz'sadal. Olomouc oli lidnuseks hätken aigan, ruhtinasen keskuz. Vl 1253 se sai kunigazlidnan statusad, i vhesai 1641 oli imperijan Moravii-grafkundan pälidnaks.

Olomoucan episkopatan aluz om pandud vl 1063, om olmas arhiepiskopataks vspäi 1777 tähäsai.

Olomouc šingotase mašinansauvomižel (pompad), metallurgijan tegimel, farmaceftižel tegimel, sömtegimištol (šokoladfabrik, maidproduktad, keitandsolan ümbriradmine), turizmal. Lidn om transportteiden znamasine keskuz.

Geografijan andmused

Lidn sijadase valdkundan päivnouzmas, Morav-jogen randoil (čeh.: Morava, Dunain hura ližajogi), 219 m ü.m.t. keskmäižel korktusel.

Klimat om ven kontinentaline. Voden keskmäine lämuz om +8,7 C°, oleskeleb pakaižid tal'vel −15 Cel'sijan gradushasai. Paneb sadegid 570 mm vodes.

Eläjad

Vn 2011 Čehanman rahvahanlugemižen mödhe lidnan eläjiden lugu oli 101 003 ristitud. Kaikiš suremb ristitišt oli 105 537 eläjad vl 1991. Läz 384 tuhad eläjid om lidnaglomeracijas (2019).

Palackijan universitet radab lidnas (čeh.: Univerzita Palackého v Olomouci, 20,5 tuhad üläopenikoid vl 2020, alusenpanend 1573).

Irdkosketused

• Lidnan oficialine sait (olomouc.eu). (čeh.)