Maiskii (Kabardinii da Balkarii)


Maiskii (ven.: Ма́йский, kab. da čerk.: Майскэ, kar. da balk.: Майски, turk.: Mayskıy) om Venäman lidn da lidnankund Kabardinijan da Balkarijan Tazovaldkundan päivnouzmas. Se om Maiskijan rajonan administrativine keskuz.

Maiskii
Майский (ven.)
Майскэ (kab. da čerk.)
Майски (kar. da balk.)
 Lidnanznam
 Flag
Valdkund Venäma
Eläjiden lugu (2022) 26,050 ristitud
Maiskii Майский (ven.) Майскэ (kab. da čerk.) Майски (kar. da balk.)
Pämez' Vasilii Čepurnoi
(reduku 2016—)
Telefonkod +7−86 633-xx-xxx
Avtokod 07
Aigvö UTC+3 (MSK+0)

Istorii vajehta

Eländpunktan aluz om pandud vl 1824 kuti varmitez, vspäi 1829 — Prišibskai-stanic (ven.: станица Пришибская). Vl 1925 ühtištoitihe sidä lähiženke Kotlärevskii-raudtežilonke da udesnimitihe nügüdläižikš. Vl 1965 žilo sai lidnan statusad.

Maiskii-lidn šingotase röntgenladimiden «Sevkavrentgen-D»-tegimel[1], raudbetontegimel, likörvodkantegimel i oludtegimel. Ende elektronižen mašinansauvomižen tegim i kalankazvatusen tegim radoiba mugažo.

Geografijan andmused vajehta

Lidn sijadase Čerek- da Terek-jogiden keskes, kus ned jokstas kaikiš lähemba toine toiženke edel ühthejoksmust, 217 m ü.m.t. keskmäižel korktusel. Matkad Nal'čikhasai om 45 km suvipäivlaskmha. Lähembaižed lidnad oma Prohladnii 15 km pohjoižhe, Terek 25 km suvhe i Nartkal 25 km suvipäivlaskmha. Kotlärevskai-raudtestancii radab «MurtazovoProhladnai»-keskustal vspäi 1875, sišpäi raudtesarak 40 km pitte lähteb Nal'čikannoks.

Nell' žilod da Baksan-tesar mülüdas lidnankundha Maiskijan ližaks. Lidnankundan pind — 138,3 km².

Eläjad vajehta

Vn 2010 kaiken Venäman rahvahanlugemižen mödhe lidnan eläjiden lugu oli 26 755 ristitud, lidnankundan — 27 416 ristitud, rajonan seičeme kümnendest. Kaikiš suremb lidnan ristitišt om 26..27 tuhad eläjid vspäi 2002 (27 301 rist. vl 2009). Vl 2017 kaik 27 055 ristitud elihe lidnas i 27 738 ristitud kaikes lidnankundas.

Rahvahad (enamba 0,7% vl 2010, ozutadud rahvahudenke): venälaižed — 70,0%, turkad — 11,4%, kabardalaižed — 5,6%, korejalaižed — 3,3%, čiganalaižed — 2,9%, ukrainalaižed — 1,2%, osetinalaižed — 0,9%, balkarijalaižed — 0,7%, toižed rahvahad — 4,0%.

Ortodoksižen hristanuskondan ph. Mikoi-arhangelan jumalanpert'[2] om avaitud lidnas, letihe pühäpertid vll 1907−1909. Islaman uz' pühäpert' om avaitud vl 2018.

Kabardinijan da Balkarijan agrotegimištol'žen kolledžan (Vanh Čerek-žilo) Maiskijan filial[3] andab professionališt keskopendust lidnas.

Galerei vajehta

Homaičendad vajehta

  1. Röntgenladimiden «Sevkavrentgen-D»-tegimen sait (skrz.ru). (ven.)
  2. Maiskii-lidnan pühäpertid sobory.ru-saital. (ven.)
  3. Kabardinijan da Balkarijan agrotegimištol'ne kolledž, Maiskijan filialan sait (mr-kbapk.ucoz.ru). (ven.)

Irdkosketused vajehta



Kabardinijan da Balkarijan Tazovaldkundan lidnad
Baksan | Čegem | Maiskii | Nal'čik | Nartkal | Prohladnii | Terek | Tirniauz