Prohladnii (ven.: Прохла́дный, kab. da čerk.: КъалэкӀыхь / Прохладнэ, kar. da balk.: Прохладни) om Venäman lidn da lidnümbrik Kabardinijan da Balkarijan Tazovaldkundas. Se om tazovaldkundan kahtenz' surtte lidn eläjiden lugun mödhe. Lidn om Prohladnijan rajonan administrativižeks keskuseks mugažo, ei mülü sihe vspäi 1964.

Prohladnii
Прохладный (ven.)
КъалэкӀыхь / Прохладнэ (kab. da čerk.)
Прохладни (kar. da balk.)
 Lidnanznam
 Flag
Valdkund Venäma
Eläjiden lugu (2022) 58,697 ristitud
Pind 35,08 km²
Prohladnii Прохладный (ven.) КъалэкӀыхь / Прохладнэ (kab. da čerk.) Прохладни (kar. da balk.)
Pämez' Väčeslav Arhangel'skii
(tal'vku 2021—)
Telefonkod +7−86 631-xx-xxx
Avtokod 07
Aigvö UTC+3 (MSK+0)

Istorii vajehta

Eländpunktan aluz om pandud vl 1765 kuti Prohladnai-stanic (ven.: станица Прохладная). «Rostov — Vladikavkaz»-raudtejono läbiti stanicad 1860-nzil vozil, i se šingotaškanzihe järedan maižanduzrajonan produkcijan oigenduzpunktaks. Stanic sai lidnan statusad vl 1937 nügüdläiženke nimenke, raudtestancijan nimituz jäi vajehtuseta. Suren sodan aigan lidn oli okkupiruidud Germanijan sodavägil (26. eloku 1942 — 5. viluku 1943).

Prohladnii šingotase elektrotehnižel sarakol («Kavkazkabel'»-tegim[1] i «Kavkazkabel' TM»-tegim[2], pol'veimiden tegim), kohenduzmehanižel tegimel, sauvondmaterialiden pästandal (savič i katusenkived, radubetontegesed), sömtegimišt (alkogoližiden jomiden edheotand, leibtegim, söndtavaroiden kombinat), mugažo meblinfabrik i omblendfabrik ratas lidnas. Avtoteiden i raudteiden znamasine transportsol'm.

Geografijan andmused vajehta

Lidn sijadase tazangištol, mecan da stepin zonas, Malk-jogen hural randal (kab. da čerk.: Балъкъ, Terekan hurapol'ne bassein), 215 m keskmäižel korktusel valdmeren pindan päl. Sur' Prohladnijan irrigacine kanal jokseb pohjoižhe lidnaspäi. Matkad Nal'čikhasai om 45 km suvipäivlaskmha orhal vai 60 km avtotedme. Lähembaine lidn om Maiskii 18 km suvhe orhal, raudtel vai avtol.

Prohladnii om lidnümbrikon üks'jäine eländpunkt.

Eläjad vajehta

Vn 2010 kaiken Venäman rahvahanlugemižen mödhe eläjiden lugu oli 59 601 ristitud. Vl 2018 lidnan ristitišt oli 57 857 eläjad. Kaikiš suremb ristitišt oli 61 800 eläjad vl 2003.

Rahvahad (enamba 1% vl 2010): venälaižed — 76,7%, kabardalaižed (čerkesalaižed) — 4,6%, armenijalaižed — 3,6%, turkad (turkad-meshetijalaižed) — 3,5%, korejalaižed — 3,1%, ukrainalaižed — 1,5%, čiganalaižed — 1,3%, saksalaižed — 1,0%, toižed rahvahad — 4,5%, rahvahuden ozutandata — 0,2%.

Ortodoksižen hristanuskondan nell' pühäpertid[3] oma letud lidnas: ph. Mikulai-čudonsädajan päjumalanpert' (1882−1886) valatusiden jumalanpertinke senno, Jumalanmaman Katken jumalanpert', «Kaikiden gorähižiden ihastuz»-jumalaižen jumalanpert' kaumžomal. Protestantizman nell' loičendpertid oma saudud: seičemenden päivän adventistoiden, baptizman, evangeližen uskon hristanuskojiden, lüteranine. Katoline tulend om registiruidud 1970-nzil vozil (koumanz' nevondkundaline Moskvan i Leningradan jäl'ghe). Islaman sunnitine mečet' om avaitud vl 1998 udenno kaumžomanno.

Prohladnijan äiprofil'ne kolledž[4] i Kabardinijan da Balkarijan valdkundaližen maižanduzakademijan filial oma professionaližen opendusen aluzkundoikš.

Edeline lidnümbrikon pämez' om Igor' Taraev (semendku 2016 — tal'vku 2021). Lidnan Sijaližen ičeohjandusen nevondkundan ezimez' om Andrei Birük vn 2019 vilukuspäi.

Galerei vajehta

Homaičendad vajehta

  1. «Kavkazkabel'»-tegimen sait (kavkazcabel.ru). (ven.) (angl.)
  2. «Kavkazkabel' TM»-tegimen sait (kzktm.ru). (ven.)
  3. Prohladnijan pühäpertid sobory.ru-saital. (ven.)
  4. Prohladnijan äiprofil'žen kolledžan sait (kbrptk.ru). (ven.)

Irdkosketused vajehta



Kabardinijan da Balkarijan Tazovaldkundan lidnad
Baksan | Čegem | Maiskii | Nal'čik | Nartkal | Prohladnii | Terek | Tirniauz