Lagan'

Lagan' (kalm.: Лагань, ven.: Лага́нь) om Venäman lidn da lidnankund Kalmikijan Tazovaldkundan suvipäivnouzmas. Se om Laganin rajonan administrativine keskuz, mülüb rajonha.

Lagan'
Лагань

Lidnanznam
Valdkund	Venäma
Eläjiden lugu (2021)	12,684 ristitud
Pind	91,38 km²
Pämez'	Gennadii Očirov (kül'mku 2015—)
Telefonkod	+7−84 733-xx-xxx
Avtokod	08
Aigvö	UTC+3 (MSK+0)

Istorii

Eländpunktan aluz om pandud sar'he mererandanno kuti sidanikoiden evropižen Venäman keskusespäi Lagan'-žilo vl 1871, oli mülünu Astrahanin makundha. Vspäi 1927 om Kalmikijan palaks. Vl 1936 kalanümbriradai kombinat radaškanzi, i kätihe Laganid radnikžiloks. Kalmikalaižiden deportacijan jäl'ghe vl 1944 nimitihe sidä Kaspiiskii. Aigan mändes lete ühtenzoiti sart randanke. Vl 1963 mašiništonsauvomižen tegim radaškanzi, i Kaspiiskii sai lidnan statusad. Vspäi 1991 nimitadas lidnad eziauguižikš.

Lagan' šingotase kalan ümbriradmižel i osötran kazvatusel, sömtegimišton toižil edheotandoil, om kivivoin samižen rajonan keskuseks, mugažo turizman keskuz.

Geografijan andmused

Lidn sijadase 20 m alemba mail'man valdmeren tazopindad keskmäižel korktusel, mi om 7..8 metras ülemba Kaspijan pindad. Ühtenzoitase merenke laivkanalal 10 km pitte. Matkad Elisthasai om 260 km lodeheze orhal vai 305 km avtotedme. Lähembaine lidn om Kamizäk (Astrahanin agj) 98 km pohjoižpäivnouzmha orhal vai 205 km avtotedme. Matkad lähembaižhe Ulan-Hol-raudtestancijhasai om 40 km päivlaskmha oiktal avtotel.

Lagan' om lidnankundan üks'jäine eländpunkt. Lidnankundan pind — 1 521,1 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 14 323 ristitud, rajonan seičeme kümnendest. Kaikiš suremb ristitišt oli 16 300 eläjad vl 1992. Vl 2017 kaik 13 137 ristitud elihe lidnas.

Rahvahad (enamba 1% vl 2010): kalmikalaižed — 50,2%, venälaižed — 38,2%, kazahlaižed — 7,9%, totarlaižed — 1,4%, toižed rahvahad — 2,3%, rahvahuden ozutandata — 0,05%.

Buddizman Vauvhatusen pühäpert' (suburgan) radab lidnas vspäi 1995, kaks' stupad oma olmas mugažo. Ortodoksižen hristanuskondan Mikulai-čudonsädajan jumalanpert' om olmas lidnas, letihe vll 2003−2011.

Politehnine tehnikum om lidnan professionaližen opendusen aluzkundaks.

Irdkosketused

• Lidnan tobmuden sait (algmo-rk.ru). (ven.) (angl.) (saks.)

	Kalmikijan Tazovaldkundan lidnad
	Elist | Gorodovikovsk | Lagan'