Gorodovikovsk

lidn Venämas


Gorodovikovsk (ven.: Городовико́вск, kalm.: Бәәшңтә «pert'kulunke», «čuhundusenke») om Venäman lidn da lidnankund Kalmikijan Tazovaldkundan päivlaskmaižes čogas. Se om Gorodovikovskan rajonan administrativine keskuz.

Gorodovikovsk
Городовиковск (ven.)
Бәәшңтә (kalm.)
Lidnanznam
Valdkund Venäma
Eläjiden lugu (2021) 8,397 ristitud
Pind 15,6 km²
Gorodovikovsk Городовиковск (ven.) Бәәшңтә (kalm.)
Pämez' Artöm Okunov
(kül'mku 2020—)
Telefonkod +7−84 731-xx-xxx
Avtokod 08
Aigvö UTC+3 (MSK+0)

Istorii vajehta

Eländpunktan aluz om pandud vl 1871 kuti kalmikalaižiden Bašant-žilo (ven.: село Башанта́) elänzoitmaha tahondad anttud umal, nimitihe jogen mödhe. Vn 1943 28. päiväl tal'vkud deportiruihe kalmikalaižid, i vhesai 1957 žilo oli mülünu Rostovan agjaha. Radnikžilo sai lidnan statusad vl 1971, udesnimitihe Oka Gorodovikov-polknikjenaralan muštho.

Gorodovikovsk šingotase paštandsijal, mellical, makaroniden cehal, rajonkeskusen socialižen infrastrukturan holitišil. Ei ole tegimišton järedoid edheotandoid lidnas. Se om ümbärtud maižanduzrajonal, mahuz om mustma. Nevondkundaližel aigal konservtegim, voitegim, savičuntegim i omblendfabrik radoiba lidnas.

Geografijan andmused vajehta

Lidn sijadase 64 m keskmäižel korktusel valdmeren pindan päl. Matkad Elisthasai om 234 km päivnouzmha. Lähembaine lidn om Sal'sk (Rostovan agj) 53 km lodeheze orhal vai 60 km avtotedme.

Klimat om ven kontinentaline. Voden keskmäine lämuz om +10,3 C°, heinkun-elokun +22..+23 C°, tal'vkun-uhokun −1..−3 C°. Ekstremumad oma −25 C° i +42 C°. Paneb sadegid 468 mm vodes, kuidme läz tazomäras, enamba kezakus (55 mm). Sadegiden lugumär voib vajehtadas lujas vozidme.

Gorodovikovsk om lidnankundan üks'jäine eländpunkt. Lidnankundan pind — 175,86 km².

Eläjad vajehta

Vn 2010 kaiken Venäman rahvahanlugemižen mödhe eläjiden lugu oli 9 480 ristitud, rajonan viž ühesandest. Kaikiš suremb ristitišt oli 11..12 tuh. eläjid vll 1979−1992 (11 902 rist. vl 1989). Vl 2017 kaik 8 798 ristitud elihe lidnas.

Rahvahad (enamba 1% vl 2010): venälaižed — 63,4%, kalmikalaižed — 25,4%, turkad-meshetijalaižed — 1,9%, saksalaižed — 1,5%, ukrainalaižed — 1,5%, armenijalaižed — 1,1%, korejalaižed — 1,0%, toižed rahvahad — 2,9%, rahvahuden ozutandata — 1,3%.

Buddizman Zonkava-valdoičijan tantrine pühäpert' om saudud vll 2005−2008. Ortodoksižen hristanuskondan kaks' jumalanpertid[1] oma avaitud lidnas: ph. Aleksii-carinpoigan (om letud vll 2007−2018) i Mikoi-arhangelan.

Professionaližen opendusen aluzkundad oma Äiprofil'ne kolledž[2] i Bašantan kolledž F.G. Popovan nimed[3] (Kalmikijan valdkundaližen universitetan filial).

Edeline lidnankundan pämez' (ahlači) om Sergei Sereda (2010 — reduku 2020).

Galerei vajehta

Homaičendad vajehta

  1. Gorodovikovskan pühäpertid sobory.ru-saital. (ven.)
  2. Gorodovikovskan Äiprofil'žen kolledžan sait (mpk-rk.ru). (ven.)
  3. Bašantan kolledžan sait (bkkgu.ru). (ven.)

Irdkosketused vajehta



Kalmikijan Tazovaldkundan lidnad
Elist | Gorodovikovsk | Lagan'