L'gov

L'gov (ven.: Льгов) om Venäman lidn, lidnümbrik da raudtesol'm Kurskan agjan päivlaskmas. Se om agjan nellänz' lidn eläjiden lugun mödhe, L'govan rajonan administrativižeks keskuseks mugažo, ei mülü sihe.

L'gov
Льгов

Lidnanznam
Valdkund	Venäma
Eläjiden lugu (2018-01-01)	18,774 ristitud
Pind	37,4 km²
Pämez'	Vladimir Vorobjov (reduku 2017—)
Telefonkod	+7−47 140-xx-xxx
Avtokod	46
Aigvö	UTC+3 (MSK+0)

Istorii

Eländpunkt mainitase ezmaižen kerdan ph. Ipatijan jumalankodin aigkirjas vl 1152 Ol'gov-nimitusenke (ven.: Ольгов). Lidnuz oli muretud 12. voz'sadan lopus i eile olmas pit'kan aigan. Vspäi 1571 Gorodenskai-varjoičendsija (ven. Городенская сторожа) mainitase Venäman röunal, kaiči sidä kalaidajid heimoid vaste. Vll 1630−1764 vanhuskolaižiden jumalankodi oli olmas, i slabad senno sai makundan lidnan oficiališt statusad vl 1779 nügüdläiženke nimitusenke amuižen lidnan oiktastuseks. Kahten čuradusen raudted ristikoittas lidnas 19. voz'sadan lopuspäi: «Kijev — Voronež» i «Har'kov — Bränsk». Toižen mail'man sodan aigan lidn oli okkupiruidud nacistoil (27. reduku 1941 — 3. keväz'ku 1943).

L'gov šingotase elektrolaudoiden tegimel, sömtegimištol (sahartegim, maidkonservine kombinat, leibtegim), mugažo kombisömän edheotand, pilindedheotand i omblendfabrik ratas lidnas.

Geografijan andmused

Lidn sijadase Seim-jogen hural randal tobjimalaz (ven.: Сейм 696 km pitte, Desnan hura ližajogi), 150 m ü.m.t. keskmäižel korktusel. Matkad Kurskhasai om 62 km päivnouzmha orhal, 83 km avtotel vai 76 km raudtel. Lähembaižed lidnad oma Ril'sk 41 km päivlaskmha orhal, 46 km avtotedme vai 65 km raudtedme, i Kurčatov 26 km päivnouzmha orhal, 39 km avtotedme vai 30 km raudtedme. Koume raudtestancijad: L'gov-1-Kijevskii lidnan suves, L'gov-2-sortiruindstancii lidnan päivlaskmaižel röunal, Šerekino pohjoižes.

L'gov om lidnümbrikon üks'jäine eländpunkt. Lidnankundan pind — 37,4 km².

Eläjad

Vl 1939 lidnan ristitišt oli 7 732 eläjad. Vn 2010 Venäman rahvahanlugemižen mödhe eläjiden lugu oli 21 453 ristitud. Kaikiš suremb lidnan ristitišt oli 25..26 tuhad eläjid vll 1967−1996 (26 523 rist. vl 1979). Ortodoksižen hristanuskondan kaks' jumalanpertid i časoun' oma olmas lidnas, vanhuskolaižiden jumalanpert'.

Rahvahad (2010): venälaižed — 97,7%, toižed rahvahad — 2,3%.

Professionaližen opendusen aluzkundad oma Kurskan bazine medicinine kolledž — L'govan filial i Kurskan montažan tehnikuman L'govan filial (ende profškol nomer 6).

Galerei

• 
  Šamilän čuhunduz Seiman randpolel
• 
  Ph. Mikulai-čudonsädajan jumalanpert' (om saudud vll 1895−1905)
• 
  Kurskan montažan tehnikuman L'govan filial
• 
  L'gov-1-Kijevskii-raudtestancii vl 2007

Irdkosketused

• Lidnümbrikon oficialine sait (gorlgov.rkursk.ru). (ven.)
• Lidnan informacine sait (gorodlgov.ru). (ven.)