Kurikk

Kurikk (suom. i roč.: Kurikka) om Suomenman lidn da lidnankund valdkundan päivlaskmas. Se om Suvipohjanma-agjan kahtenz' lidnankund kahesaspäi eläjiden lugun mödhe.

Kurikk
Kurikka (suom. i roč.)

Lidnanznam
Valdkund	Suomenma
Eläjiden lugu (2024)	19,580 ristitud
Pind	1,743,91 km²
Pämez'	Anna-Kaisa Pusa (uhoku 2017—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Jumalanpertin tulend mainitase vspäi 1672. Municipalitetan aluz om pandud vl 1868. Kurikk-eländpunkt kändihe lidnanvuiččeks (suom.: kauppala) vl 1966, sai lidnan statusad (kaupunki) vl 1977. Vspäi 2009 enzne Jurv-municipalitet (suom. Jurva) mülüb lidnha, vspäi 2016 — Jalasjärvi-kund.

Kurikk šingotase mašinansauvomižel («Fortaco Oy», ende «Velsa», — avtokabinad, «Relicomp Oy» — palad krepindanke lehtezterasespäi) i meblin edheotandal («Pohjanmaan Kaluste Oy»). Lidnan municipalitet valdoičeb «Neste»-kompanijan i «Fortum»-koncernan akcijoiden palal.

Geografijan andmused

Lidnankundan transportkart (2016)

Lidn sijadase agjan suvipäivlaskmas. Kürönjogi (suom.: Kyrönjoki, roč.: Kyro älv 127 km pitte) läbitab kundan keskust, sädase Jalasjogen i Kauhajogen ühthejoksmusel lidnan suves 45 m ü.m.t.. Kundan kaikiš korktemb čokkoim om Lehtivuori päivlaskmha lidnaspäi, se om 196 m ü.m.t. kortte.

Matkad lidnaspäi agjan Seinjogi-keskushesai om 29 km pohjoižpäivnouzmha orhal vai 34 km avtotedme, Hel'sinkihesai om 304 km suvhe-suvipäivnouzmha orhal, 345 km avtol vai raudtel. Toine lähembaine lidn (avtol) om Kauhajogi 24 km suvipäivlaskmha.

Vn 2022 andmusiden mödhe lidnan ühthine pind om 1 743,91 km², sidä kesken kuivma — 1 724,63 km², vezi i sokaz ma ottas 19,28 nellikkilometrad (kaik om 34 järved).

Tobmuz

Kurikkan municipaline suim kogoneb 43 ezitajaspäi.

Paavo Türväinen (suom.: Paavo Tyrväinen) radoi lidnan edeližeks pämeheks (2009−2015). Jalasjärvi-kundan Juha Luukko-pämez' radoi Kurikkan lidnanpämehen velgusentäutajaks vspäi 2016 pordon aigad.

Eläjad

Vl 1980 lidnankundan eläjiden lugu oli 27 208 ristitud, vl 2000 — 24 406 ristitud, vl 2010 — 22 811 ristitud, vl 2020 — 20 656 ristitud. Kaikiš suremb kundan ristitišt oli 27 312 eläjad vl 1985.

Mamankelen mödhe (2016): suomen kel' — 98,2 %, ročin kel' — 0,3 %, toižed keled — 1,5 %.

Galerei

• 
  Lidnan kirjišt (2019)
• 
  Kurikkan jumalanpert', vn 2017 nägu
• 
  «Timber Halli»-jäpert'kulu (2017)
• 
  Kurikkan raudtestancijan sauvuz vl 2018

Irdkosketused

• Lidnan oficialine sait (kurikka.fi). (suom.)