Karačajevsk

Karačajevsk (ven.: Карача́евск, kar. da balk.: Къарачай шахар, abaz.: Къарча къала, kab. da čerk.: Къэрэшей къалэ, nog.: Карашай шахар) om Venäman lidn Karačajan da Čerkesijan Tazovaldkundan keskuses. Se om tazovaldkundan koumanz' eländpunkt eläjiden lugun mödhe, om Karačajevskan lidnümbrikon administrativine keskuz, mugažo Karačajevskan rajonan pälidnaks (ei mülü rajonha).

Karačajevsk
Карачаевск (ven.)
Къарча къала (abaz.)
Къэрэшей къалэ (kab. da čerk.)
Къарачай шахар (kar. da balk.)
Карашай шахар (nog.)

Lidnanznam
Valdkund	Venäma
Eläjiden lugu (2022)	20,626 ristitud
Pind	11,84 km²
Pämez'	Robert Kipkeev (sügüz'ku 2022—)
Telefonkod	+7−87 879-xx-xxx
Avtokod	09
Aigvö	UTC+3 (MSK+0)

Istorii

Eländpunktan aluz om pandud karačailaižil vl 1926 kuti Georgijevskoje. Vl 1927 udesnimitihe Mikojan-Šahar:aks (ven.: Микоян-Шахар). Vl 1929 se sai lidnan statusad. Vll 1944−1957 nimitihe Kluhori:kš (ven.: Клухори). Vll 1944−1955 oli Gruzijan NST:n palaks, sid' mülütihe Stavropolin randha möst. Rahvahan reabilitacijan jäl'ghe vspäi 1957 lidn nimitase nügüdläižikš.

Karačajevsk šingotase elektroühtenzoitajiden paloiden tegimel i sömtegimišton edheotandoil (oludtegim, leibtegim, maidtegim), mugažo betoniž-šebin'tegim i kalankazvatusen edheotand (torp) ratas.

Geografijan andmused

Lidn sijadase Kubanin i sen huran Teberd-ližajogen kaikil randoil, 857 m ü.m.t. keskmäižel korktusel. Matkad Čerkesskhasai om 52 km pohjoižhe orhal vai 59 km avtotedme. Lähembaižed lidnad om Ust'-Džegut 40 km pohjoižhe i Teberd 44 km suvhe avtol.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 21 483 ristitud, lidnümbrikon pol'. Vl 2018 lidnan ristitišt oli 21 067 eläjad, lidnümbrikon — 38 588 eläjad. Kaikiš suremb lidnan ristitišt oli 22 113 eläjad vl 2002.

Rahvahad (enamba 0,5% vl 2010, ozutadud rahvahudenke): karačailaižed — 81,6%, venälaižed — 11,3%, osetinalaižed — 1,8%, čerkesalaižed — 0,9%, totarlaižed — 0,8%, ukrainalaižed — 0,5%, toižed rahvahad — 3,1%.

Islaman pämečet' om avaitud lidnas. Ortodoksižen hristanuskondan ph. Panteleimonan jumalanpert' om saudud vodele 1997. Vižkümnenden päivän jumalankodikundan loičendpert' radab.

Lidnan profopendusen aluzkundad oma Karačajevsk-lidnan Politehnine kolledž, Rahvahidenkeskeine nügüd'aigaižen ohjandusen avol'jaine kolledž (Čerkessk) — Karačajevskan filial, Karačajan da Čerkesijan valdkundaline universitet U.D. Alijevan nimed (Karačajevsk, ei ole filialoid, alusenpanend 1938).

Lidnümbrikon pämez' om lidnan Duman ezimez', edeline om Ali Semönov (uhoku 2011 — sügüz'ku 2022). Lidnümbrikon mer (Administracijan pämez') om Marat Urusov vn 2022 sulakuspäi (velgusentäutai). Edeližed merad oma Al'bert Dotdaev (reduku 2020 — sulaku 2021), Alik Dinaev (reduku 2017 — reduku 2020).

Galerei

• 
  Torg lidnümbrikon tobmuden sauvusenno (2011)
• 
  Karačajevskan Keskuzline mečet', vn 2008 nägu
• 
  El'brus-adivpert' vl 2017
• 
  Karačajan da Čerkesijan valdkundaližen universitetan kampus (2011)
• 
  Lidnan irdan nägu vl 2012

Irdkosketused

• Lidnümbrikon tobmuden aluzkundoiden oficialine sait (karachaevsk.info). (ven.)