Avaita pämenü


Kadui (ven.: Кадуй) om Venäman lidnanvuitte žilo Vologdan agjan suvipäivlaskmas. Se om Kadujan rajonan administrativine keskuz da kaikiš suremb eländpunkt.

Kadui
Кадуй
Valdkund Venäma
Eläjiden lugu (2016) 11 252 ristitud
Pind 44 km²
Kadui Кадуй
Pämez' Nikolai Ševelöv (2 005-)
Telefonkod +7-81 742-xx-xxx
Avtokod 35
Aigvö UTC+3 (MSK+0)

IstoriiRedaktiruida

Eländpunktan aluz om pandud vl 1904 kuti Kadui-raudtestancii PiterVologd raudtel. Sil vodel sauvoihe raudtestancijan pertid. Jonused ajaškanziba vspäi 1906. Stancii om nimitadud Kadui-külän mödhe, kudamb sijadase 7 km pohjoižpäivnozmha. Sauvomižen aigan sirdihe raudted projektan rindataden ümbärdamha Andog-jogi, no stancijad nimitihe projektan mödhe. Vl 1927 Kadui-stancii tegihe ühtennimižen rajonan administrativižeks keskuseks. Vl 1947 kezakun 7. päiväl se sai lidnanvuiččen žilon statusad 2,5 tuhad ristitištonke.

1960-70-nzil vozil zavottihe sauda Čerepovecan GRES:ad lodeheze žilospäi. Nügüd' nece lämuzelektrostancii om žilon da rajonan kaikiš suremb edheotand, sen agj om 6 tuh. ristitištonke, mülüb municipaližhe ühtnikha.

Municipaline «Kadui-žilo»-ühtnik om olmas vspäi 2006, se völ mülütab koume pen't küläd 119 eläjanke (vl 2016). Žilonpäiv praznuičese kezan jäl'gmäižel sobatal.

Geografijan andmusedRedaktiruida

Žilo sijadase rajonan suvipäivnouzmas, läbipäzmatomiden soiden keskes, Sudanjogen (Volgan bassein) oiktal randpolen da ČerepovecVolhov raudten keskes. Sudanjogen pen' oiged Voron-ližajogi läbitab žilod. Matkad Vologdhasai om 156 kilometrad päivnouzmha orhal, 172 km avtotedme. Lähembaine lidn om Čerepovec, 44 kilometrad päivnouzmha orhal, 58 km avtotedme. Rajonan toine lidnanvuitte Hohlovo-žilo sijadase 15 km päivnouzmha avtotedme, läz A114-trassad.

Klimat om ven. Voden keskmäine lämuz om +3,2°C.

Kadui alajagase vidhe agjaha: Vanh Kadui (läz raudtestancijad), GRES, DOZ (punümbriradai tegim), Sudan reid i Hutorok (futorut), niišpäi nell' oma ühtenzoittud rengaztel.

TobmuzRedaktiruida

16 ezitajad mülüdas municipaližen ühtnikan Nevondkundha (ven. Совет муниципального образования). Valitihe heid järgenduseližen kerdan vl 2013 sügüz'kun 8. päiväl (koumanz' kucund)[1]. Heiden valdatusiden strok om nell' vot. Aleksandr Marčenko radab sen ezimehen.

Nikolai Ševelöv radab municipaližen ühtnikan pämehen da tegeb administracijan pämehen velgusiden mödhe vn 2005 kezakuspäi koumanden strokun jäl'geten. Administracijan südäin: administracijan pämehen varapämez', 5 palakundad, kaik om 16 radnikad[2].

EläjadRedaktiruida

Vn 2002 Venäman rahvahanlugemižen mödhe eläjiden lugu oli 11 798 ristitud (kaikiš suremb ristitišt), vl 2010 — 11 291 ristitud. Rajonan ristitišton kaks' koumandest eläb žilos.

Ortodoksižen hristanuskondan Filippan-Irapan jumalanpert' om žilos.

Ižanduz da transportRedaktiruida

Ižandusen sarakod oma:

  • lämuzenergetik (Čerepovecan GRES);
  • sauvondmaterialiden pästand (metallkonstrukcijad, sauvondblokad, faner);
  • sömtegimišt (vin, möuk);
  • pumaterialan süvä ümbriradmine;
  • maižanduz, kalankazvatuz.

Sarak «VologdUz' Ladog»-avtotespäi (A114-trassaspäi) tuleb žilho. Raudtestancii om žilos. Avtobusad oma kundaližeks transportaks žilon südäimes.

Kodirandantedištandmuzei, kul'turpert', sädamižen lapsidenkeskuz, sportškol, fizkul'turiž-tervehtamižkompleks i ujundbassein oma žilos. Opendusen aluzkundad oma 2 keskškolad i energetine kolledž specialiženke opendusenke.

HomaičendadRedaktiruida

IrdkosketusedRedaktiruida