El'b

El'b vai El'banjogi (čeh.: Labe [ˈlabɛ], saks.: Elbe [ˈɛlbə], üläluž. i alaluž.: Łobjo; alasaks.: Elv — «jogi» norvegijaks) om jogi Čehanmas da Saksanmas, lankteb Pohjoižmerhe. El'ban kaikiš znamasižemb ližajogi om Vltav.

El'b Ustiš El'bal

Päandmused

Jogen piduz om 1 091 km. Basseinan pind om 148 268 km², se om nellänz' Evropas, 24,4 mln ristituid elädas siš (2018). Veden valu vajehtab jogensunno 493..1232 m³/s röunoiš, keskmäine om 870 m³/s.

Geografine ümbrikirjutand

El'ban bassein

Joginišk sijadase Čehanman pohjoižes Pol'šanman röunanno, Krkonoše-mägil (vai Ogibalad mäged, Sudetiden pala), 1386 m ü.m.t. korktusel, sädase Vauktan El'ban (čeh.: Bílé Labe) da äiluguižiden ojiden ühthejoksmusel.

Vltav om znamasižemb mi El'b niiden ühthejoksmusen sijanno kaikil parametroil (piduz 434 km i 294 km, bassein, veden valu), no istorižikš penemb jogi nimitase El'baks. Jogi om sättui sur'vezile, jäl'gmäižed oliba vozil 2002, 2006 i 2013, sen tagut ehtatimed oma levitadud tähäsai, kaik radab 24 ehtatimjonod.

Otand kävutamižhe

Sättub laivoiden likundale Vltavan lanktendan sijaspäi. Koume kanalad ühtenzoittas joged tarbhaižidenke sijidenke: Kil'-lidnanke (Baltijan meren port), Berlinanke i Rurštadtanke Keskuzsaksanman kanalal, koumanz' mäneb Lübekaspäi (Baltijan meren port) Braunšvaig-lidnhasai (Keskuzsaksanman kanal). Om vezivaradimid üläjoksmuses (Čehanma) i ližajogil.

Nell' rahvahališt puištod oma sätud Saksanmas jogen randoil.

Järedad lidnad jogen randoil (mödvedhe): Hradec Kralove, Pardubice, Usti El'bal (Čehanma), Drezden, Vittenberg, Magdeburg, Gamburg (Saksanma). Redustihe joged äi vot, no sen puhtastandan program om väges.

Irdkosketused

• El'b da sen bassein rivernet.org-saital. (saks.)