Bergen
Bergen (mugažo kirjutase norvegijan kelel, virktas [ˈbæ̀ɾɡn̩]) om lidn da municipalitet (kommun) Norvegijan suvipäivlaskmas. Se om valdkundan kahtenz' lidn eläjiden lugun mödhe, Vestland-agjan üks' kahtes administrativižes keskusespäi (edel 2020. vot oli Hordalann-agjan keskuz), toine om Hermansverk-külä.
Lidnanznam
|
Flag
|
| Valdkund | Norvegii |
| Eläjiden lugu (2019) | 283,929 ristitud |
| Pind | 464,71 km² |
| |
| Pämez' | Marit Varnke (reduku 2023—, Marit Warncke) |
| Telefonkod | +47- |
| Aigvö | tal'vel UTC+1, kezal UTC+2 |
Istorii vajehta
Eländpunktan aluz om pandud Olaf III-kunigahal vl 1070 norv.: Bjørgvin-nimitusenke (Björgvin). Lidn om pandud Pohjoižmeren Vogenan merikaran randan pol'sarel, mitte om kaitud saril merospäi. Norvegijan kunigahad i jepiskopad eliba Bergenhus-lidnuses 12. da 13. voz'sadal. Vll 1217−1299 Bergen oli keskaigaižen Norvegijan pälidnaks. Ganzan torgovanad ohjastiba lidnas 14.-18. voz'sadal. Lidn vastsi Evrovizii-pajokonkursad vl 1986.
Bergen šingotase järedal meriportal amussai, se om kaikiš suremb valdkundas (56 mln tonnoid jüguid, 9. sija Evropas, i 350 tuhad passažiroid vl 2009). Lidn om akvakul'turan i laivansauvomižen keskuz, kivivoinümbriradmižen i šel'fsamižen tehnologijan edheotandad ratas kundas. Valdkundan üläopendusen, turizman i finansoiden znamasine keskuz.
Geografijan andmused vajehta
Lidn sijadase Pudde-fjordan randal, keskuz om viž metrad ü.m.t. keskmäižel korktusel. Kundan kaikiš korktemb čokkoim om Gull'fjell'stoppen-mägi (987 m). Om äi reskveden järvid lidnankundan röunoiš. Kaik nell' sildad ühtenzoittas lidnad lähižidenke kundoidenke. Matkad Oslo-pälidnhasai om 496 km päivnouzmha raudtedme vai avtotedme.
Klimat om ven valdmeren neps, subarktižen röunal. Voden keskmäine lämuz om +7,7 C°, kezakun-elokun +13,5..+14,5 C°, tal'vkun-uhokun +1,5..+2,6 C°. Ekstremumad oma −19,3 C° (viluku) i +31,9 C° (eloku). Kezaaigan minimum om 0 C° (kezaku), tal'vaigan maksimum om +18,8 C° (tal'vku). Ei olele haloid sügüz'kus. Paneb sadegid 2250 mm vodes, enamba sügüz'kus-tal'vkus (235..283 mm kus), vähemba sulakus (114 mm) i semendkus (106 mm). Meriveden lämuz om +6..+14 C° voden aigan.
Tombuz vajehta
Bergen jagase kahesaks nimitadud administrativižeks rajonaks (norv.: bydel).
Edeližed lidnan pämehed (norv.: ordfører) oma Linn Kristin Engö (reduku 2022 — reduku 2023, Linn Kristin Engø), Rune Bakervik (sügüz'ku 2021 — reduku 2022), Marte Mjos Persen (reduku 2015 — sügüz'ku 2021, Marte Mjøs Persen).
Eläjad vajehta
Vn 2010 rahvahanlugemižen mödhe lidnan eläjiden lugu oli 256 580 ristitud, vl 2000 — 229 496 ristitud. Kaikiš suremb lidnan ristitišt om nügüd'.
Vl 2007 etnižed norvegijalaižed otiba 84,5 % ristitištos, verazmalaiženke augotižlibundanke — 15,5 %.
Transport vajehta
Avtobusad, trolleibusad, kiruhtramvaid (Bybanen-sistem) i funikulörad oma kundaližeks transportaks lidnas.
Rahvahidenkeskeine civiline Bergen (Flesland)-lendimport[1] (BGO / ENBR, 6,3 mln passažiroid vl 2018) sijadase 18 km suvipäivlaskmha lidnan keskusespäi. Tehtas reisid Evropan äjihe lidnoihe, mugažo Norvegijadme, om äi sezončarterreisid Keskmeren lebutahoiže.
Homaičendad vajehta
- ↑ Rahvahidenkeskeine Bergen-lendimport avinor.no-saital. (norv.) (angl.)
Irdkosketused vajehta
- Lidnan oficialine sait (bergen.kommune.no). (norv.) (angl.)
| Bergen Vikiaitas |