Berdsk

Berdsk (ven.: Бердск) om Venäman lidn da lidnümbrik Novosibirskan agjan päivnouzmas. Se om agjan kahtenz' lidn eläjiden lugun mödhe, Novosibirskan suvine ezilidn.

Berdsk
Бердск

Lidnanznam	Flag
Valdkund	Venäma
Eläjiden lugu (2021)	103,561 ristitud
Pind	67 km²
Pämez'	Evgenii Šesternin (kül'mku 2015—)
Telefonkod	+7−38 341-xx-xxx
Avtokod	54, 154
Aigvö	UTC+7 (MSK+4)

Istorii

Eländpunktan aluz om pandud vl 1716 kuti Berdskan lidnuz (ven.: Бердский острог) Berdin basseinan eläjiden tahton mödhe kaičemhas ümbrišton kalaidajiš heimoišpäi, nimitihe Berd'-jogen mödhe (ven.: Бердь). Vl 1782 anttihe lidnan statusad i nimitihe Kolivan'-lidnaks (ven.: Колывань) gubernijan keskusen statusanke, no vodele 1797 pučihe Kolivanin gubernijan projektaspäi Obin sur'veziden tagut i kätihe lidnad Berdskoje-žiloks. Vl 1929 žilo sai kezaküläpertiden Berdsk-žilo-nimitust, vl 1934 kätihe sidä radnikžiloks. Vn 1944 9. päiväl uhokud Berdsk sai lidnan statusad agjan alištusenke, mülütihe Berdsk-raudtestancijad kahesas kilometras, Krasnii Sokol-žilod i lebupertid.

Vll 1953−1957 sirtihe lidnad udhe sijha läz täuzin Berdsk-raudtestancijannoks Novosibirskan vezivaradimen sauvondan taguiči (täutmine oli vl 1959), i vodele 1959 sen ristitišt ližadui 29 021 eläjhasai.

Berdsk šingotase elektromehanižel i lämoipalosignalizacijan tegimil, kodielotehnikan tegimel (elektrobardveiččed), sauvondmaterialiden pästandal (pumaterialad, vahtbeton, špalerad), biosubstancijoiden tegimel, omblendfabrikal, pakuitesen edheotandal i sömtegimištol (leibänkombinat, maidtegim), mugažo lebutahoks (viž sanatorijad, kaks' pansionatad, nell' sportkompleksad, kaks' lebubazad, koume lebupuištod i jahtklub).

Geografijan andmused

Lidn sijadase Novosibirskan vezivaradimen oiktal randal (Ob'-jogi), Berdskan nemel, 130 m ü.m.t. keskmäižel korktusel. Om kanghid lidnas ümbri läz 20 km² pindanke. Lähembaine lidn om Novosibirsk ani pohjoižhe, lidnümbrik röunatab Iskitiman rajonanke mugažo. Toine lähembaine lidn om Iskitim kümnes kilometras suvipäivnouzmha orhal, 18 km avtol, raudtel vai vetme.

Berdsk om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 96 800 ristitud. Kaikiš suremb lidnan ristitišt oli 104 334 eläjad vl 2020. Sadatuhanz' lidnan eläi om sündnu vl 2012.

Ortodoksižen hristanuskondan viž pühäpertid oma avaitud lidnas: Sündun Toižetamižen päjumalanpert' (om saudud vodele 2004), kaks' jumalanpertid i kaks' časounäd.

Berdskan politehnine kolledž, kommertižetoman Novokolledžan kampus videspäi (Novosibirsk), Novosibirskan medkolledžan Berdskan filial, Novosibirskan üläopendusen aluzkundoiden kaks' filialad oma lidnan professionaližen opendusen aluzkundoikš.

Transport

Avtobusad da ezilidnelektrojonused ühtenzoittas lähižidenke lidnoidenke da oma kundaližeks transportaks lidnas.

Jogivaldmad i sodalendimport oma saudud, no kävutihe niid harvoin.

Galerei

• 
  Lidnan tobmuden aluzkundoiden sauvuz (2014)
• 
  Muštnik Berdskan eläjiden vägitegos Suren sodan aigan (2016)
• 
  Spasan Toižetamižen kafedraline päjumalanpert', vn 2006 nägu vai sen aigemba (om saudud vll 1992−2004)
• 
  Berd'-jogi lidnas, vn 2007 nägu
• 
  «Germes»-torguindkeskuz vl 2007
• 
  «Rodina»-kul'turkeskuz (2007, Kodima)
• 
  «Zimaleto»-jäkompleks (2007, Tal'vkeza)
• 
  Jahtklub Pohjoine-mikrorajonas vl 2007
• 
  Rečkunovk-raudtestancijan sauvuz vl 2007

Irdkosketused

• Lidnan tobmuden aluzkundoiden oficialine sait (berdsk.nso.ru). (ven.)