Čulim (lidn)

Čulim (ven.: Чулым) om Venäman lidn da lidnankund Novosibirskan agjan keskuzpalas. Se om Čuliman rajonan administrativine keskuz.

Čulim
Чулым

Valdkund	Venäma
Eläjiden lugu (2021)	10,296 ristitud
Pind	25 km²
Pämez'	Andrei Stepanov (keväz'ku 2010—)
Telefonkod	+7−38 350-xx-xxx
Avtokod	54, 154
Aigvö	UTC+7 (MSK+4)

Istorii

Eländpunktan aluz om pandud vl 1762 Čulimskai-küläks udel «Moskv — Sibir'»-traktal. 19. voz'sadal sirdanuded paniba Romanovskoje-žilon alust Čulimskai-külänno. Transsib-raudte läbiti tahondad Romanovskoje-žilonno vll 1893−1896, i se kändihe žiloks Čulimskai-raudtestancijanno. Ezmäine passažirjonuz tuli Čulimskoje-žilho vl 1913. Romanovskoje- i Čulimskoje-žilod ühtištuiba aigan mändes, i vl 1935 kätihe Čulim-radnikžiloks. Vn 1947 19. päiväl elokud anttihe lidnan statusad.

Čulim šingotase raudten edheotandoil (vedimdepo, raudten distancii) i sömtegimištol (argvoisagudkombinat, leibtegim).

Geografijan andmused

Lidn sijadase ühtennimižen jogen oiktal randal tobjimalaz, 130 m ü.m.t. keskmäižel korktusel. Itkul'-järv om 2 km suvipäivnouzmha lidnaspäi. «Irtiš»-avtote (R-254) om lidnan pohjoižröunaks. Matkad Novosibirskan keskushesai om 125 km päivnouzmha orhal, 138 km avtol vai 129 km raudtedme. Lähembaižed lidnad oma Kargat 42 km päivlaskmha orhal, 50 km avtotedme vai raudtel, i Ob' 110 km orhal vai niil-žo teil, no päivnouzmha.

Čulim om lidnankundan üks'jäine eländpunkt. Lidnankundan pind — 223,31 km².

Eläjad

Vn 2010 Venäman rahvahanlugemižen mödhe eläjiden lugu oli 12 tuh. ristituid, rajonan pol'. Kaikiš suremb ristitišt oli 18 161 eläjad vl 1959.

Ortodoksižen hristanuskondan Jumalanmaman Sündundpäivän pühäpert' om olmas lidnas (2009).

Čuliman rajonidenkeskeine agrarine licei om professionaližen opendusen aluzkundaks.

Galerei

• 
  Keskškol nomer 1, vn 2017 nägu
• 
  Čuliman licei (järgeline keskopenduz) vl 2017
• 
  Lapsiden sädamižen pert' (2017)
• 
  Čulimskai-päraudtestancijan sauvuz vl 2021

Irdkosketused

• Lidnan tobmuden aluzkundoiden oficialine sait (admchulym.nso.ru). (ven.)