Čulim (lidn)

Čulim (ven.: Чулы́м) om Venäman lidn da lidnankund Novosibirskan agjan keskuzpalas. Se om Čuliman rajonan administrativine keskuz.

Čulim
Чулым

Valdkund	Venäma
Eläjiden lugu (2021)	11,034 ristitud
Pind	15,4 km²
Pämez'	Andrei Stepanov (sulaku 2010—)
Telefonkod	+7−38 350-xx-xxx
Avtokod	54, 154
Aigvö	UTC+7 (MSK+4)

Istorii

Eländpunktan aluz om pandud vl 1762 Čulimskai-küläks udel «Moskv — Sibir'»-traktal. 19. voz'sadal sirdanuded paniba Romanovskoje-žilon alust Čulimskai-külänno. Transsib-raudte läbiti tahondad Romanovskoje-žilonno vll 1893−1896, i se kändihe žiloks Čulimskai-raudtestancijanno. Ezmäine passažirjonuz tuli Čulimskoje-žilho vl 1913. Romanovskoje- i Čulimskoje-žilod ühtištuiba aigan mändes, i vl 1935 kätihe Čulim-radnikžiloks. Vn 1947 19. päiväl elokud anttihe lidnan statusad.

Čulim šingotase raudten edheotandoil (vedimdepo, raudten distancii) i sömtegimištol (argvoisagudkombinat, leibtegim).

Geografijan andmused

Lidn sijadase ühtennimižen jogen oiktal randal tobjimalaz, 130 m ü.m.t. keskmäižel korktusel. Itkul'-järv om kahtes kilometras suvipäivnouzmha lidnaspäi.

«Irtiš»-avtote (R-254) om lidnan pohjoižröunaks. Matkad Novosibirskan keskuzpalhasai om 125 km päivnouzmha orhal, 138 km avtol vai 129 km raudtedme. Lähembaižed lidnad oma Kargat 42 km päivlaskmha orhal, 50 km avtotedme vai raudtel, i Ob' 110 km orhal vai niil-žo teil, no päivnouzmha.

Tobmuz

Čulim om lidnankundan üks'jäižeks eländpunktaks. Lidnankundan pind — 171,92 km² (vai 223,31 nellikkilometrad).

Lidnankundan tobmuden pämez' om sen Administracijan pämez'. Lidnan Deputatoiden nevondkundan 16 ühtnijad pandas lidnan pämest radnikusele videks vodeks. Kaik rahvaz valičeb heid videks vodeks mugažo. Nevondkundan ezimez' om Tat'jana Černiševa vn 2015 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 12 tuh. ristituid, rajonan pol', vn 2021 — 11 034 ristitud. Kaik 11 270 eläjad oli lidnas vl 2017. Kaikiš suremb lidnan ristitišt oli 18 161 eläjad vl 1959.

Ortodoksižen hristanuskondan kaks' pühäpertid oma saudud da avaitud lidnas: Pühän Jumalanmaman Sündundpäivän jumalanpert' (saudihe vodele 2009) i časoun' senno (Veran, Nadeždan, Lübovin i heiden Sofija-maman, 2009).

Lapsiden opendusen aluzkundad oma severz'-se päivkodid, aluzškol (nomer 5), kaks' keskškolad (nomer 1 i 9), lapsiden sädamižen pert', muzikškol, rajonan lapsiden da norišton sportškol. Čuliman licei (ende Čuliman rajonidenkeskeine agrarine licei) om lidnan professionaližen opendusen aluzkundaks.

Galerei

• 
  Keskškol nomer 1, vn 2017 nägu
• 
  Čuliman licei (järgeline keskopenduz) vl 2017
• 
  Lapsiden sädamižen pert' (2017)
• 
  Čulimskai-päraudtestancijan sauvuz vl 2021

Irdkosketused

• Lidnankundan tobmuden sait (admchulym.nso.ru). (ven.)