Belozerskan ümbrik

(Oigetud lehtpolelpäi Belozerskan rajon)

Belozerskan ümbrik (ven.: Белозерский округ) om ümbrik (edel vn 2022 kezakud — rajon) Venäman Vologdan agjas.

Belozerskan ümbrik
Белозерский округ
Znam
Flag
Valdkund Venäma
Administrativine keskuz Belozersk
Eläjiden lugu (2023) 13,492 ristitud
Pind 5,398,04 km²
Belozerskan ümbrik Белозерский округ

Administrativine keskuz om Belozersk-lidn.

Istorii vajehta

Ümbrikon aluz om pandud kut rajon vn 1927 elokun 1. päiväl Leningradan agjan Čerepovecan ümbrikos. Vn 1930 heinkun 23. päiväl heittihe sidä ümbrikod, i vhesai 1937 rajon mülüi Leningradan agjaha kut administrativine ühtnik. Vn 1937 sügüz'kun 23. päiväspäi mülüb Vologdan agjaha. Ümbrik om olmas nügüdläižiš röunoiš vspäi 1965.

Geografijan andmused vajehta

Ümbrikon territorii sijadase päivlaskmha da suvhe Vaugedjärven randalpäi, rajonidenkeskeine röun läbitab järved lodehespäi suvipäivnouzmha. Volgan-Baltijanmeren vezite ümbärdab Vaugedjärven randad. Ümbrikon piduz pohjoižespäi suvhe — 120 km, päivlaskmaspäi päivnouzmha — 95 km.

Pind — 5 398,04 nellikkilometrad. Mec otab territorijan nell' videndest (4525 km²). Kaik om 131 järved ümbrikos.

Om röunoid kudenke Vologdan agjan ümbrikonke i rajonanke:

Londuseližed varad oma turbaz, sauvondmaterialad (letked, gravii, dolomit), mec, kala, reskvezi.

Tobmuz vajehta

Vn 2015 kezakun 1. päiväspäi rajonan territorii jagoihe kudeks municipaližeks ühtnikaks: üks' lidnankund da viž küläkundad. Kaik ned oma kätud ümbrikon territorialižikš ohjanduzkundoikš vn 2022 kezakuspäi.

Vn 2013 keväz'kun 10. päiväspäi Jevgenii Vladimirovič Šaškin oli valitud da radoi rajonan da sen administracijan pämehen, Ühthine Venäma-partijan ühtnii. Kaik viž ohjandust alištuiba rajonan administracijale.

Käskusenandai tobmuz om Ezitajiden Suim (videnz' kucund, 19 ezitajad). Järgvaličendad sihe oliba vn 2012 keväz'kun 4. päiväl. Aleksei Petrovič Jakovčuk radoi sen ezimehen vl 2015.

Käskuzkundaline tobmuz om Belozerskan ümbrikon käskuzkund.

Eläjad vajehta

Vn 2002 Venäman rahvahanlugemižen mödhe rajonan eläjiden lugu oli 21 468 ristitud, vn 2010 — 19 065 ristitud, vn 2021 — 13 851 ristitud.

Rahvahad (enamba 0,4 % vl 2021): venälaižed — 96,9 %, toižed rahvahad — 2,1 %, rahvahuden ozutandata — 1,0 %.

Kaik om 275 eländpunktad ümbrikos, niiden kesken üks' lidn, 17 žilod, 252 küläd, nell' sijašt da üks' Kargolom-futor. Niišpäi 106 eländpunktad seištas kaikenaigaižeta ristitištota: kaks' žilod, sada küläd, koume sijašt i futor.

Toižed sured eländpunktad oma Zubovo-žilo (1,5 tuh. rist. vl 2002) i Alamondom-žilo (1,1 tuh. rist. vl 2002).

Ižanduz vajehta

Ümbrikon ižandusen päsarakod oma mecan varhapanend da ümbriradmine, jogitransport da turizm[1], sömtegimišt da maižanduz.

  • AAS «Belozerskii lespromhoz» («Belozerskan mectegimišton ižanduz»)
  • «Belozerskije elektroteploseti»-edheotand («Belozerskan elektrolämbituzverkod»)
  • AAS «Vologdaavtodor»:an palakund

Transport vajehta

Rajonankeskeižed avtoted asfal'tižbetonižen alusenke: Belozersk — Čerepovec, Belozersk — Vologd.

Belozerskan avtostancijan adres: Komsomolskaja-ird, 18.

Homaičendad vajehta

  1. Belozerskan rajonan investicine pasport rajonan belozer.ru-saital. — 60 lp. — Lpp. 8−29. (ven.)

Irdkosketused vajehta