Argun (ven.: Аргу́н, čeč.: Устрада-ГӀала / Орга-ГІала vai УстаргӀардойн-Эвла) om Venäman lidn da lidnümbrik Čečenijan Tazovaldkundan keskuzpalas.

Argun
Аргун (ven.)
Устрада-ГӀала / Орга-ГІала (čeč.)
 Lidnanznam
 Flag
Valdkund Venäma
Eläjiden lugu (2021) 41,622 ristitud
Pind 28,11 km²
Argun Аргун (ven.) Устрада-ГӀала / Орга-ГІала (čeč.)
Pämez' Ibragim Ajubov
(sügüz'ku 2019—)
Telefonkod +7−87 147-xx-xxx
Avtokod 20, 95
Aigvö UTC+3 (MSK+0)


Lidnümbrik Čečenijan Tazovaldkundan kartal (tal'vku 2019)

Istorii vajehta

Eländpunktan aluz om pandud 18. voz'sadal kuti Ustargardoi. Ustar kändase «(azegišton) mastar» türkižiš kelišpäi, gardoi (čeč.: гIоьрда) om veičen (teran) toižend. Žilo sai lidnan statusad vl 1967, venäkel'ne nimituz om anttud jogen mödhe. Vspäi 1990 lidn alištub tazovaldkundan tobmudele oikti. Voziden 1994−1996 sodan aigan Argunan tegimišt i äjad pertid oliba muretud.

Argun šingotase sauvondmaterialiden tehmižel (raudbetontegesed, metalline lava), «VAZ»-avtoiden ühthekeradamižedheotandal (enzne mašiništon tegim jomižcehoiden täht), metalližtegesiden pästandal (sured vezibakad, katl'ad), sömtegimištol (sahar, jauh), mugažo Argunan LEK radab.

Geografijan andmused vajehta

Lidn sijadase Argun-jogen oiktal randal (čeč.: ЧІаьнтий-Орг, Terekan oigedpol'ne bassein), 116 m keskmäižel korktusel valdmeren pindan päl.

Matkad Grozniihasai om kümne kilometrad päivlaskmha raudtedme vai avtol. Toižed lähižed lidnad oma Gudermes 25 km pohjoižpäivnouzmha i Šali 10 km suvhe orhal vai 15 km avtol. Argun-raudtestancii om lidnan pohjoižes.

Tobmuz vajehta

Kaik koume žilod mülüdas lidnümbrikho Argunan ližaks vspäi 2020: Čečen-Aul (9300 rist. vl 2019), Berdikel' (6945 rist. vl 2010) i Primikanije (313 rist. vl 2010). Lidnümbrikon pind om 130,21 km².

Edeližed lidnümbrikon pämehed (Deputatoiden Nevondkundan ezimehed) oma Eskerhan Bašaev (kül'mku 2016 — reduku 2017) i Naiba Timirsultanov (reduku 2017 — sügüz'ku 2019). Lidnan mer om Iles Masaev vn 2020 heinkuspäi. Edeližed merad oma Has-Magomed Kadirov (eloku 2019 — heinku 2020), Ibragim Temirbajev (radoi vn 2019 elokuhusai).

Eläjad vajehta

Vn 2010 kaiken Venäman rahvahanlugemižen mödhe lidnan eläjiden lugu oli 29 525 ristitud. Kaik 36 486 eläjad oli lidnas i kaikes lidnümbrikos vl 2017. Kaikiš suremb lidnan ristitišt oli 41 767 eläjad vl 2009 (mitte-se eländpunkt mülüi Argunha kaks' vot) i om nügüd' (41 622 ristitud vl 2021). Kaiken lidnümbrikon ristitišt om 59 615 eläjad vl 2021.

Rahvahad (2002): čečenalaižed — 98,1 %, venälaižed — 1,1 %, toižed rahvahad — 0,8 %.

Islaman pämečet' Aimani Kadirovan nimed om saudud lidnas vll 2011−2014.

Argunan valdkundaline tehnikum[1] om lidnan professionaližen opendusen aluzkundaks.

Galerei vajehta

Homaičendad vajehta

  1. Argunan valdkundaližen tehnikuman sait (pu29.prof95.ru). (ven.)

Irdkosketused vajehta



Čečenijan Tazovaldkundan lidnad
Ačhoi-Martan | Argun | Groznii | Gudermes | Kurčaloi | Oishar | Šali | Urus-Martan