Ačhoi-Martan

Ačhoi-Martan (ven.: Ачхо́й-Марта́н, čeč.: Тӏехьа-Марта / Iашхой-Марта) om Venäman lidn da lidnankund Čečenijan Tazovaldkundan päivnouzmas. Se om Ačhoi-Martanan rajonan administrativine keskuz, mülüb rajonha.

Ačhoi-Martan
Ачхой-Мартан (ven.)
Тӏехьа-Марта / Iашхой-Марта (čeč.)

Valdkund	Venäma
Eläjiden lugu (2020)	24,864 ristitud
Pind	74,59 km²
Pämez'	Ibragim Madaev (kül'mku 2020—)
Telefonkod	+7−87 142-xx-xxx
Avtokod	20, 95
Aigvö	UTC+3 (MSK+0)

Istorii

Eziauguine Ačhoi-eländpunkt oli muretud čečenan i carin sodavägiden toran aigan vl 1840.

Nügüdläižen eländpunktan aluz om pandud kuti Ačhoiskoje-varmitez vl 1846, sid' Ačhoi-Martan oficialižikš. Žilo sai nimed kahten jogen mödhe: Ačho (Ačhu, čeč.: Iашхо / Iашху) jokseb lidnan päivnouzmaižeks röunaks, Fortang-jogi (čeč.: Марта, ven.: Фортанга) läbitab lidnan keskuzpalad. Rahvahan deportacijan aigan žilon nimituz oli Novosel'skoje vll 1944−1957, sid' pördihe endišt nimed. Žilo sai lidnan statusad vn 2023 6. päiväl uhokud, edel se oli tazovaldkundan kaikiš järedamb külähine eländpunkt.

Ačhoi-Martan šingotase torguindan keskusil, plasmassan tegimel, sauvondmaterialiden järedal bazal i tehmižel (raudprofil', iknad, uksed), meblin edheotandal, konditerižiden tegesiden pästandal, semniden ümbriradmižen tegimel. Valdkundaline maižandusen edheotand om otnus villänkul'turoiden, saduiden i kabjživatišton kazvatushe.

Geografijan andmused

Lidn sijadase rajonan pohjoižpalan päivlaskmas, Kavkazan ezimägištol, 247 m keskmäižel korktusel valdmeren pindan päl. Nohčiin-Kort-mägi om lidnan suves. Matkad Grozniihasai om 36 km päivnouzmha-pohjoižpäivnouzmha orhal vai 49 km avtoteidme, «Kavkaz»-avtotrass mäneb kudes kilometras pohjoižhe. Lähembaine lidn om Urus-Martan 21 km päivnouzmha orhal vai 23 km avtotedme.

Ačhoi-Martan om lidnankundan üks'jäine eländpunkt. Lidnankundan pind — 74,59 km², sen ližaks kaik rajonan suvipala alištub lidnan tobmudele.

Eläjad

Vn 2010 kaiken Venäman rahvahanlugemižen mödhe eläjiden lugu oli 20 172 ristitud. Vn 2020 uhokus lidnan ristitišt oli 24 864 eläjad, rajonan nelländez. Kaikiš suremb lidnan ristitišt om nügüd'.

Rahvahad (2010): čečenalaižed — 99,7%, toižed rahvahad i rahvahuden ozutandata — 0,3%.

Islaman pämečet' Batal-Hadži Belhoroev-šeihan nimed (voib mülütada viž tuhad uskojid) om letud lidnas vll 2013−2014.

Privatine Ačhoi-Martanan kolledž om lidnan professionaližen opendusen aluzkundaks.

Edeline Ačhoi-Martanan küläkundan Administracijan pämez' om Mohadi Hačukaev (heinku 2019 — kül'mku 2020). Ačhoi-Martanan küläkundan Deputatoiden Nevondkund om olmas.

Galerei

• 
  Fortang-jogen randird sildaspäi (2018, čeč.: Марта)
• 
  Pämečet', vn 2018 nägu
• 
  Uudimiden lauk vl 2018
• 
  Kul'turkeskuz (2018)
• 
  Keskškol nomer 5 vl 2018

Irdkosketused

• Lidnankundan oficialine sait (amartanchr.ru). (ven.)
• Lidnan i rajonan tobmuden aluzkundoiden oficialine sait (a-martan.ru). (ven.)