Šimanovsk

Šimanovsk (ven.: Шимано́вск) om Venäman lidn da lidnümbrik Amuran agjan keskuzpalan suves. Se om Šimanovskan rajonan administrativižeks keskuseks mugažo, ei mülü rajonha.

Šimanovsk
Шимановск

Lidnanznam	Flag
Valdkund	Venäma
Eläjiden lugu (2023)	16,178 ristitud
Pind	50 km²
Pämez'	Dmitrii Lebedev (reduku 2022—)
Telefonkod	+7−41 651-xx-xxx
Avtokod	28
Aigvö	UTC+9 (MSK+6)

Lidnümbrikon sijaduz agjan kartal (2013)

Istorii

Eländpunktan aluz om pandud vl 1910 kuti Transsiban Per-žilo raudtestancijanno (ven.: Пера). Vll 1914−1920 žilon nimituz oli Gondatti. Vladimiro-Šimanovskii-radnikžilo sai lidnan statusad vl 1950 nügüdläiženke nimenke. Vspäi 1975 alištub agjan tobmudele oikti.

Šimanovsk šingotihe sauvondmaterialiden tehmižel BAM:an täht edel 1990-nziden voziden lopud. Järedoiden edheotandoiden bankrotnendan jäl'ghe mašiništonsauvomižen tegimen pala i mecan edheotand ratas lidnas. Ristitišton enambuz radab kosmodroman objektoiden sauvondas Ciolkovskii-lidnanno.

Geografijan andmused

Lidn sijadase Sur' Per-jogen üläjoksmusen randoil (ven.: Большая Пера, Zejan oiged ližajogi), 270 m ü.m.t. keskmäižel korktusel.

Matkad Blagoveščenskhasai om 190 km suvhe orhal vai 245 km avtotedme. Lähembaižed lidnad oma Ciolkovskii 39 km suvipäivnouzmha orhal, 52 km avtotedme vai raudtedme, i Svobodnii 75 km suvipäivnouzmha orhal vai 100 km niil-žo teil.

Klimat om ven. Keza om läm' neps, tal'v om hätkeline vilu kuiv. Voden keskmäine lämuz om −1,5 C°, kezakun-elokun +17,4..+20,1 C°, tal'vkun-uhokun −20,6..−25,6 C°. Ekstremumad oma −49,0 C° (viluku, tal'vku) i +39,1 C° (kezaku). Kezaaigan minimum om −2,0 C° (kezaku), tal'vaigan maksimum om +2,7 C° (uhoku). Ei voi panda halad heinkus vaiše (minimum +1,2 C°). Ei voi olda sulasäd tal'vkus-vilukus. Paneb sadegid 496 mm vodes, enamba kezakus-elokus (79..126 mm kus), vähemba kül'mkus-keväz'kus (6..17 mm kus).

Tobmuz

Šimanovsk om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez' (mer). Edeline mer om Pavel Berezovskii (2007−2011, sulaku 2016 — semendku 2022). Lidnan Rahvahandeputatoiden nevondkundan ezimez' om Svetlana Boeško vn 2021 tal'vkuspäi, hän radoi sil-žo radnikusel vn 2019 redukuhusai. Edeline nevondkundan ezimez' om Tat'jana Domnikova (reduku 2019 — tal'vku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 19 815 ristitud, vn 2021 — 16 488 ristitud. Kaik 18 706 eläjad oli lidnas vl 2017. Kaikiš suremb lidnan ristitišt oli 25..26 tuhad eläjid vll 1979−1998 (26 500 rist. vl 1992).

Ortodoksižen hristanuskondan kaks' jumalanpertid oma saudud i avaitud lidnas: kivine Spasan Londuseližen Mel'kuvan (letihe vspäi 2005) i puine Jumalanmaman Emäganpäivän (saudihe vll 1995−2000 edelrevolücižes pertišpäi).

Lapsiden opendusen aluzkundad oma severz'-se päivkodid, nell' keskškolad (nomerad 1..4), lapsiden sädamižen keskuz, čomamahtoiden škol (ende eriži muzikškol i čomamahtoine škol), sportškol. Amuran tehnižen kolledžan (Svobodnii) palakund nomer 3 om lidnan professionaližen opendusen aluzkundaks.

Galerei

• 
  Muštnik Vladimir Leninale (2008)
• 
  Šimanovskai-päraudtestancijan sauvuz vl 2012
• 
  Nevondkundaline rindazznam
• 
  Edeline lidnanznam (2009)

Irdkosketused

• Lidnümbrikon tobmuden sait (admshim.amurobl.ru). (ven.)