Vžesn'

Vžesn' (pol'š.: Września [ˈvʐɛɕɲa], saks.: Wreschen) om lidn da raudtesol'm Pol'šanman keskuzpalan päivlaskmas, Suren Pol'šanman sodaveikundas. Lidn om Vžesnin povätan (rajonan) i sen gminan (makundan) administrativine keskuz.

Vžesn'
Września

Lidnanznam
Valdkund	Pol'šanma
Eläjiden lugu (2019)	30,688 ristitud
Pind	12,73 km²
Pämez'	Tomaš Kalužni (2018−2023, Tomasz Kałużny)
Telefonkod	+48−61
Aigvö	tal'vel UTC+1, kezal UTC+2

Istorii

Eländpunkt mainitase ezmäižen kerdan vl 1256. Valitihe lopulišt sijadust 14. voz'sadal, saihe lidnan oiktusid vl 1375. Sen aigan kirjutadud lidnan nimed oliba Wressna (1317), Wresna (1364). Vžesn'-raudtestancii radab lidnas 19. voz'sadan lopuspäi. Toižen mail'man sodan jäl'ghe Vžesnin vezivaradim (26 ga, koume kilometrad pitte) om sätud Vžesnic-jogel lebukodinke.

Vžesn' šingotase Volkswagen-kompanijan avtotegimel (om letud vll 2014−2016, koumhe tuhazesai radnikoid, 85 tuhad avtoid vodes) läz lidnad, opendusen i kul'turan äiluguižil aluzkundoil. Suren Pol'šanman pen' sagud (ser liliput wielkopolski) sädase lidnas. Ende elektrotehnižen sarakon tegimed prevaliruiba («Tonsil»-änenlujendimed, «Mera-Zapmont»-avtomatik, «Mikroma»-elektrolikutimed), heinän ümbriradmižen «Herbapol»-tegim radoi.

Geografijan andmused

Lidn sijadase 50 km päivnouzmha Poznanišpäi, Vžesnic-jogen randoil (pol'š.: Wrześnica 49 km pitte, Vartan oiged ližajogi), 90..110 m korktusil valdmeren pindan päl.

Eläjad

Vl 2004 Vžesnin eläjiden lugu oli 28 631 ristitud, vl 2014 — 28 692 ristitud.

Kuz' katolišt pühäpertid, protestantizman kaks' pühäpertid (baptizm, lüteranižuz) i Jehovan tundištajad-organizacijan kaks' suimad ratas lidnas.

Irdkosketused

• Vžesn'-lidnan da gminan oficialine sait (wrzesnia.pl). (pol'š.)