Ust'ka

Ust'ka (ven.: Вознесе́нье, suom.: Voznesenje / Syvärinniska) om Venäman lidnanvuitte žilo Leningradan agjan i sen Kos'kenaluižen rajonan pohjoižpäivnouzmas. Se om Ust'kan lidnankundan administrativižeks keskuseks.

Ust'ka
Вознесенье

Lidnanznam	Flag
Valdkund	Venäma
Eläjiden lugu (2021)	2,217 ristitud
Pämez'	Sergei Safin (heinku 2021—)
Telefonkod	+7−81 365-xx-xxx
Avtokod	47
Aigvö	UTC+3 (MSK+0)

Lähembaižed lidnad oma Kos'kenaluine (91 km) i Vitegr (Vologdan agj).

Istorii

Voznesenjan jumalankodi oli olmas Süvärin oiktal randal vll 1563−1764. Ende Voznesenskii Pogost- i Svirskoje Ust'je oliba Ust'kan sijas. Žilon aluz om pandud niiden ühtištusel 19. voz'sadan keskes kuti külä oficialiženke Voznesenje-nimenke (vai Namoinije Peski) Änižen kanalan sauvondan tagut. Vn 1935 elokun 20. päiväl külä kändihe žiloks. Vozil 1927−1954 Ust'ka oli ühtennimižen rajonan administrativižeks keskuseks. Toižen mail'man sodan aigan žilo oli Suomenman okkupacijan al vodhesai 1944.

Nened edheotandad ratas Ust'ka-žilos: jogiport, laivišton kohenduzbaz, mectegimišton edheotand, Jakornai-lebubaz.

Geografijan andmused

Žilo om Leningradan agjan kaikiš edahaižemb Piterišpäi lidnalaine eländpunkt. Matkad Piterihesai om 356 kilometrad päivlaskmha.

Ust'ka-žilo seižub Süvär'-jogen muugotil randoil i Änižjärven randištol, 39 m ü.m.t. keskmäižel korktusel.

Ust'kan lidnankundan pind om 1722 km². Se mülütab Ust'ka-žilod da ühesa küläd. Niiden tobj pala sijadase läz Änižrandad.

Tobmuz

Lidnankund jagase kahteks valičemižümbrikoks. Sen Ezitajiden Nevondkund mülütab 10 deputatad. Lidnankundan edeline pämez' (Ezitajiden Nevondkundan ezimez') om Ol'ga Fatejeva (sügüz'ku 2014 — sügüz'ku 2019), oli Jelena Vedükova (sügüz'ku 2019 — heinku 2021, koli). Lidnankundan Administracijan pämez' om Denis Davidov (ven.: Денис Давыдов) vn 2020 vilukuspäi (mugažo oli sil radnikusel edel vn 2017 uhokud). Edeline Administracijan pämez' om Marija Mužikova (uhoku 2017 — viluku 2020).

Mülüjad lidnankundha küläd Äniženrandan mödhe (pohjoižespäi suvhe):

• Kukagd'
• Heimd'ogi
• Kall'
• Rusked Bor
• Ust'ka-žilo
• Bogdanovo
• Kiprušino

Seižutadud Juksovičin järven randal küläd lidnankundan suvipäivlaskmas:

• Agj
• Rodionovo
• Sobolevščin

Eläjad

Vl 1873 Ust'kan eläjiden lugu oli 241 ristitud. Vn 2010 kaiken Venäman rahvahanlugemižen mödhe 2425 ristitud elihe žilos i 3029 ristitud — kaikes lidnankundas. Kaikiš suremb žilon ristitišt oli 7009 eläjad vl 1939, 3302 eläjad vl 1959 i 3123 eläjad vl 1989.

Vn 2002 kaiken Venäman rahvahanlugemižen mödhe 30 vepsläšt elihe žilos (1,1 % 2817 eläjaspäi).

Ortodoksižen hristanuskondan kaks' pühäpertid oma avaitud žilos: Sündun Voznesenjan jumalanpert' (om saudud vll 2000−2007) i puine časoun' valdmoidenno. Kaks' tošt jumalanpertid ei olend udessündutadud.

Professionaližen opendusen aluzkundad ratas lähembaižiš lidnoiš.

Transport

Kundal'ne transport om avtobusoiden lidnankeskeižed reisad Piterihesai da Kos'kenaluižhe. Ehtatim ühtenzoitab Süvär'-jogen randoid (ujund otab kümne minutad, lähtend läz kerdan čashu).

Lähembaine sur' raudtestancii passažiroiden täht radab Kos'kenaluižes, se sijadase 102 kilometras päivlaskmpolehe avtotedme.

Galerei

• 
  Vodnikoiden ird (2018)
• 
  Sündun Voznesenjan jumalanpert', vn 2014 nägu
• 
  «Vepsän zamk», vai saudud Suomenman vägil varmitusiden «Linnoitus "Ahmansilmä"»-kompleks («Hahmansil'm»-lidnuz), vn 2020 olend. Bunkeran nomer 1 tulend
• 
  Muštpacaz Mariinskai-vezisisteman «Ust'ka — Vitegr»-kanalan vaumičendan oiktastuseks (2017)
• 
  Üks' ehtatimišpäi vl 2008

Irdkosketused

• Ust'ka-žilon lidnankundan oficialine sait (admvoznesenie.ru). (ven.)