Suvivaldmeri

Suvivaldmeri (angl.: Southern Ocean, ende Suvine jävaldmeri) om valdmeri Antarktidas ümbri, röunatase pohjoižespäi 60-ndel leveduzpirdal. Se om oficialižeta statusata mail'mas tähäsai, no valdmeren ozutand rekomenduiše kartoil. Üks'jäine valdmeri, kudamb ümbärdab kontinentad täuzin, röunatab koumenke toiženke valdmerenke, i ei ole röunatud mal.

Oficialižikš Suvivaldmeri om Tünen, Atlantižen i Indižen valdmeriden suvipalad, no ku se om, ka röunatab kaikidenke niidenke. Voib märita Suvivaldmeren röunad kut viluiden antarktižiden joksmusiden ühtenzoitusen pird edel koumen valdmeren lämhembid vezid. Se röun vajehtab sijadust kaikenaigaižešti voz'aigha kacten, ka märičend ei sättu praktikan metoiden täht. Vl 2000 Rahvahidenkeskeižen gidrografižen organizacijan ühtnijad vahvištiba Suvivaldmert videks valdmereks röunanke 60-ndme leveduzpirdadme i Kožundaktan Antarktikas mödhe, no dokument valdmeren erištundas ei ole ratificiruidud täuzin tähäsai, sen paloin, Venäman kaičendministrusen sodamerilaivišton gidrografine radnikoičend ei tundišta valdmert. Gidrofizine i ekosistemiden tedod erištadas Suvivaldmert amu jo. Avstralijan ohjastuz pidab Suvivaldmert kut levitadud vezid ani suvhe Avstralijan kontinentaspäi.

Suvivaldmeren pind om 20,327 mln km², se om Antarktidan i 60-nden leveduzpirdan keskes. Kaikiš suremb süvüz om 8264 m Suvisandvičun kurnus, keskmäine süvüz — 3270 m. Randanpird — 17 968 km. Erištadas 13 mert Antarktidan randoidenno: Ueddellan, Skotia (Skošan) meri, Bellinsgauzenan, Rossan, Amundsenan, Deivisan, Lazarevan, Riser-Larsenan, Kosmonavtoiden, Ühtištusen, Mousonan, Dürvilän, Somovan mered; mugažo Hokon VII-kunigahan meri om olmas Norvegijan täht. Valdmeren kaikiš znamasižembad sared: Suvišetlandan sared, Suviorkneižed sared. Antarktidan šel'f levitase 500 metrhasai süvüdel, sikš miše kontinentan jäkatken veduz om sur'kulu.

Valdmeren veden lämuz vajehtase −2..+10 C° röunoiš. Elo siš om erazvuitte kauktaha klimatha kacmata.

Homaičendad

Suvivaldmeri Vikiaitas

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.