Severobaikal'sk

Severobaikal'sk (ven.: Северобайкальск, burät.: Хойто Байгалай хото) om Venäman lidn da lidnümbrik Burätijan Tazovaldkundan pohjoižes. Se om tazovaldkundan kahtenz' eländpunkt eläjiden lugun mödhe.

Severobaikal'sk
Северобайкальск (ven.)
Хойто Байгалай хото (bur.)

Lidnanznam
Valdkund	Venäma
Eläjiden lugu (2021)	23,304 ristitud
Pind	110,54 km²
Pämez'	Oleg Kotov (sulaku 2018—)
Telefonkod	+7−30 130-xx-xxx
Avtokod	03
Aigvö	UTC+8 (MSK+5)

Istorii

Eländpunktan aluz om pandud vl 1974 kuti BAM:an raudtestancii i kangazpertiden žilo. Vn 1975 sügüz'kul registriruihe Severobaikal'sk-radnikžilod. Se sai lidnan statusad vl 1980. Planiruihe lidnad 140 tuhazesai eläjiden lugun mödhe.

Severobaikal'sk šingotase kalanümbriradajan tegimel, raudten i mectegimišton edheotandoil, turizmal (termaližed purtked).

Geografijan andmused

Lidn sijadase Baikalan pohjoižrandal, 500 m ü.m.t. keskmäižel korktusel, voib olda lujid manrehkaidusid. Matkad Ulan Udehesai om 440 km suvhe orhal. Lähembaižed lidnad oma Irkutskan agjan Ust'-Kut 255 km päivlaskmha-lodeheze orhal, raudtedme vai 345 km avtotedme i Kirensk 250 km lodeheze-pohjoižhe orhal vai 410 km avtotedme. Regionaline lendimport sijadase 25 km pohjoižpäivnouzmha Nižneangarsk-žilos. Kezaaigan voib sadas Irkutskhasai lämuzlaival järvedme.

Severobaikal'sk om lidnümbrikon üks'jäine eländpunkt. Lidnümbrikon pind — 110,54 km².

Eläjad

Vn 2010 kaiken Venäman rahvahanlugemižen mödhe eläjiden lugu oli 24 929 ristitud. Kaikiš suremb ristitišt oli 30 700 eläjad vl 1987.

Ortodoksižen hristanuskondan Jumalanmaman Kazanin jumalaižen kafedraline päjumalanpert' om saudud vodele 2009.

Galerei

• 

  Lidnan administracijan sauvuz (oiktalpäi, 2007)

• 

  Poliklinik (2009)

• 

  Kül'bendrand vl 2012

• 

  Portan valdmad vl 2004

• 

  Severobaikal'sk-päraudtestancii vl 2014

Irdkosketused

• Municipaližen «Severobaikal'sk-lidn»-ühtnikan tobmuden lehtpoled Burätijan Tazovaldkundan oficialižel egov-buryatia.ru-saital. (ven.)