Malgobek

Malgobek (ven.: Малгобе́к, inguš.: МагӀалбике) om Venäman lidn da lidnümbrik Ingušetijan Tazovaldkundan lodehes. Om Malgobekan rajonan administrativižeks keskuseks, ei mülü rajonha. Vn 2007 redukuspäi om Venälaižen Federacijan sodahoštusen lidnaks.

Malgobek
Малгобек (ven.)
МагӀалбике (ing.)

Lidnanznam	Flag
Valdkund	Venäma
Eläjiden lugu (2023)	37,339 ristitud
Pind	100,79 km²
Pämez'	Mussa Galaev (sügüz'ku 2019—)
Telefonkod	+7−8734-xxx-xxx
Avtokod	06
Aigvö	UTC+3 (MSK+0)

Istorii

Nügüdläižen eländpunktan aluz om pandud vl 1934, Voznesenskoje-žilo kändihe Malgobek-radnikžiloks samha kivivoid. Vn 1939 elokun 27. päiväspäi se om lidnan statusanke. Suren sodan aigan nacistižen Germanijan sodaväged napriba anastada lidnan strategišt tahod i sen löudmižsijid, frontan pird mäni lidnan territorijadme vn 1941 redukuspäi, päzutihe vihanikoišpäi vn 1943 3. vilukud. Vll 1944−1957 Malgobek mülüi Pohjoižosetijha čečenalaižiden i ingušoiden deportacijan tagut. Sen jäl'ghe lidn alištui Čečenijad da Ingušetijan avtonomižen tazovaldkundan tobmudele oikti. Om Ingušetijan palaks tazovaldkundan jagon aigaspäi vl 1992.

Malgobek šingotase kivivoin samižen edheotandal, lämuzdiodižiden lampoiden tegimel i sömtegimištol (leibtegim, jauhkombinat). Nevondkundaližen aigan savičuntegim radoi mugažo.

Geografijan andmused

Lidn sijadase Alhančurt-alangištos, 409 m keskmäižel korktusel valdmeren pindan päl. Om ümbärtud mägil: Terekan mägisel'g om pohjoižes, Sunžan mägisel'g om severziš-se kilometriš lidnaspäi suvhe.

Matkad Magashasai om 40 km suvipäivnouzmha orhal. Alhančurtan kanalan päivlaskmaine sarak jokseb pidust' lidnan röunad suvipäivnouzmas.

Tobmuz

Malgobek om ümbrikon üks'jäižeks eländpunktaks. Kaik nevondkundaližed žilod ümbri lidnas oma hudrad kivivoin samižen da reduvaluiden tagut, pidab sirta niiden eläjid lidnha.

Edeližed Lidnan Administracijan pämehed (municipaližen ühtnikan pämehed) oma Suleiman Egiev (kül'mku 2018 — sügüz'ku 2019) i Šarpudin Mamilov (Шарпудин Мамилов, tal'vku 2016 — kül'mku 2018). Lidnan Nevondkundan ezimez' om Usman Jevloev vn 2016 tal'vkuspäi. Edeline Nevondkundan ezimez' om Šarpudin Mamilov (2013−2016).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 31 018 ristitud. Vl 2017 lidnan ristitišt oli 36 870 eläjad. Kaikiš suremb lidnan ristitišt oli 55 200 eläjid vl 2000 (lühüdaks aigaks).

Rahvahad (enamba 0,4 % vl 2010): ingušad — 89,7 %, čečenalaižed — 6,6 %, venälaižed — 1,6 %, turkad — 1,0 %, toižed rahvahad — 0,4 %, rahvahuden ozutandata — 0,7 %.

Kaik kuz' islaman pühäpertid oma avaitud lidnas.

Ingušan Islamine universitet Hamathan-Hadži Barzievan nimed, sen kolledž i privatine Pohjoižkazvkazan sarakoidenkeskeine kolledž (vspäi 2022) oma lidnan professionaližen opendusen aluzkundoikš.

Galerei

• 
  Edeline lidnanznam (2013−2020)
• 
  Allei Geidar Alievan nimed (2018)
• 
  Nevondkundaližiden sodamehiden velleskaum (Suren sodan pölištunuded), vn 2018 nägu
• 
  IS-3-tank monumentaks Malgobekan kaičijoile Suren sodan aigan (1942−1943), 2011. voz'

Irdkosketused

• Lidnan tobmuden aluzkundoiden sait (malgobek.gosuslugi.ru) i sen vanh versii (malgobek.ru, edel vn 2023 elokud). (ven.)