Karabulak (lidn)

Karabulak (ven.: Карабула́к, inguš.: Илдарха-ГӀала / Карабулак) om Venäman lidn da lidnümbrik Ingušetijan Tazovaldkundan keskuzpalan pohjoižes. Se om tazovaldkundan koumanz' lidn eläjiden lugun mödhe.

Karabulak
Карабулак (ven.)
Илдарха-ГӀала / Карабулак (inguš.)

Lidnanznam	Flag
Valdkund	Venäma
Eläjiden lugu (2023)	43,772 ristitud
Pind	83,61 km²
Pämez'	Ahmed Didigov (kezaku 2023—)
Telefonkod	+7−87 344-xx-xxx
Avtokod	06
Aigvö	UTC+3 (MSK+0)

Istorii

Eländpunktan aluz om pandud vl 1859 kuti kozakoiden Karabulakskai-stanic (ven.: станица Карабулакская). Vn 1962 29. kül'mkud kätihe stanicad lidnanvuiččeks žiloks. Žilo sai lidnan statusad vl 1995. Sätihe lidnümbrikod sen alusel vl 2009.

Karabulak šingotase «Himreagent»-tegimel, sauvondmaterialiden edheotandoil (raudbeton, asfal't), mugažo jauhkompleks i kartonažfabrik ratas.

Geografijan andmused

Lidnümbrikon sijaduz tazovaldkundas vn 2010 kartal

Lidn sijadase lidnümbrikon suves, Alkančurtskii-kanalan randal i Sunž-jogen hural randal (Terekan bassein), 410 m keskmäižel korktusel valdmeren pindan päl.

Matkad Magashasai om 25 km suvipäivlaskmha. Lähembaine lidn om Sunž kahesa kilometrad päivnouzmha.

Tobmuz

Karabulak om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeližed Administracijan pämehed oma Magomed-Bašir Oskanov (kül'mku 2019 — kezaku 2023), Ahmed Bitiev (tal'vku 2016 — kül'mku 2019). Lidnan Deputatoiden nevondkundan ezimez' om Alihan Hamhoev vn 2023 redukuspäi, edeližed oma Mikail Dzangiev (vn 2023 semendku — reduku, velgusentäutai), Magomed Martazanov (reduku 2019 — semendku 2023), Jahja Kitiev (vn 2019 viluku — reduku), Magomet Ganiev (2011−2018). Edel vn 2019 redukud Deputatoiden nevondkundan ezimez' oli lidnümbrikon pämehen.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 30 961 ristitud, vn 2021 — 43 037 ristitud. Vl 2017 lidnan ristitišt oli 39 614 eläjad. Kaikiš suremb lidnan ristitišt om nügüd'.

Rahvahad (enamba 0,4 % vl 2010): ingušad — 97,1 %, čečenalaižed — 1,2 %, venälaižed — 0,8 %, toižed rahvahad — 0,2 %, rahvahuden ozutandata — 0,7 %.

Islaman koume pühäpertid oma saudud lidnas, niiden kesken Keskuzline mečet'. Ortodoksine hristanuskond Kazanin Jumalanmaman jumalanpert' om avaitud lidnas.

Lapsiden opendusen aluzkundad oma severz'-se päivkodid, seičeme keskškolad (nomer 1..7), gimnazii (nomer 1), čomamahtoiden škol, sportškol H.R. Dzeitovan nimed. Mediciniž-tehnologine kolledž om lidnan professionaližen opendusen aluzkundaks, om olmas vspäi 2017.

Galerei

• 
  Lidnan öline nägu (2015)
• 
  Erižpertid sauvomižes (2011)
• 
  Uz' eländfartal (2015)
• 
  Znam lidnan röunal vl 2011, tulend Jandare-žilon polespäi

Irdkosketused

• Lidnan tobmuden sait (mokarabulak.ru). (ven.)