Išim (lidn, Tümenin agj)

Išim (ven.: Ишим) om Venäman lidn da lidnümbrik Tümenin agjan suvipäivnouzmas. Se om federacijan subjektan koumanz' lidn eläjiden lugun mödhe, Išiman rajonan administrativižeks keskuseks mugažo, ei mülü sihe.

Išim
Ишим

Lidnanznam	Flag
Valdkund	Venäma
Eläjiden lugu (2017)	65 259 ristitud
Pind	46,1 km²
Pämez'	Fedor Šiškin (sulaku 2 012—)
Telefonkod	+7-34 551-xx-xxx
Avtokod	72
Aigvö	UTC+5 (MSK+2)

Istorii

Eländpunktan aluz om pandud vl 1670 (vai 1687) kuti Korkin-slabad (ven.: Коркина слобода). Vspäi 1721 i kaiken 19. voz'sadan aigan vedihe Nikol'skai-jarmankad tal'vkuidme. Vl 1782 sai makundan lidnan statusad nügüdläiženke nimenke. Nimitihe jogen mödhe, mülüi Tobol'skan gubernijha.

Lidn kändihe tegimišton keskuseks 19. voz'sadan lopus. Vspäi 1913 Išim-stancii radab Transsiban päjonol, «Tümen' — Omsk»-keskustan pol'tel.

Išim šingotase mehanižel tegimel (raudtetransportan kohenduz i varapaloiden pästand), sauvondmaterialiden edheotandoil (raudbeton, asfal't), sömtegimištol (leibänproduktad, konditerine fabrik, maidkombinat, lihakombinat, alkogoližiden i alkogolitomiden jomižiden tegimed), kengiden i omblendan fabrikoil.

Geografijan andmused

Lidn sijadase Išim-jogen hural randal (Irtišan hura ližajogi), 82 metrad ü.m.t. keskmäižel korktusel. Matkad Tümenihesai om 267 km lodeheze-päivlaskmha orhal, 302 km avtotedme vai raudtedme. Lähembaižed lidnad oma Nazivajevsk (Omskan agj) 132 km suvipäivnouzmha orhal vai Transsibal, 201 km avtol, i Petropavlovsk (Kazahstan) 140 km suvhe orhal vai 163 km avtotedme.

Išim om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 65 243 ristitud. Kaikiš suremb ristitišt oli 67 800 eläjad vl 2003. Ortodoksižen hristanuskondan kaks' päjumalanpertid da jumalanpert' oma olmas lidnas.

Rahvahad (2010): venälaižed — 95,5%, toižed rahvahad — 4,5%.

Irdkosketused

• Lidnan tobmuden aluzkundoiden oficialine sait (ishim.admtyumen.ru). (ven.)