Abdulino

Abdulino (ven.: Абду́лино) om Venäman lidn Orenburgan agjan lodehes. Se om Abdulinon lidnümbrikon (1785 km²) administrativine keskuz da sen ristitišton seičeme kümnendest. Edel 2016. vot nimitihe lidnümbrikod Abdulinon rajonaks. Se mülütab 49 žilod da küläd.

Abdulino
Абдулино

Lidnanznam	Flag
Valdkund	Venäma
Eläjiden lugu (2021)	18,420 ristitud
Pind	47 km²
Pämez'	Vladimir Naseikin (viluku 2016—)
Telefonkod	+7−35 355-xx-xxx
Avtokod	56
Aigvö	UTC+5 (MSK+2)

Enzne

Eläbzoittud Abdulovankülä (ven.: деревня Абдулова) mainitase ezmäižen kerdan vodel 1795. Vodespäi 1811 nimitase nügüdläižikš. Vodel 1888 raudte tuli lidnha, ühtennimine raudtestancii om «Samar — Uf»-jonol. Vodel 1895 «Перов и Зуев»-kompanii sauvoi tegint ümbriradamha grečad surimeks. Vodelpäi 1923 Abdulino om lidnan statusanke.

Nügüd'aigan lidn om maižanduzrajonan keskuz. Leibänkombinat da maidkombinat oma olmas, om raudten holitišen edheotandoid, sauvondmaterialiden tehmine. Kivivoin da londuseližen gazan löudmižsijad oma ottud kävutamižhe läz lidnad.

Geografijan andmused

Lidn sijadase Tiris-jogen randoil (ven.: Тирис, Ik-jogen bassein), Uralan ezimägištol, 190 m keskmäižel korktusel valdmeren pindan päl. Matkad Orenburghasai om 280 km suvipäivnouzmha «Kazan' — Orenburg»-avtotedme (R239), röunhasai Baškortostananke — 4 km pohjoižpäivnouzmha lidnaspäi. Avtote om lidnan päivnouzmaižeks röunaks.

Eläjad

Voden 2010 Venäman rahvahanlugemižen mödhe lidnan eläjiden lugu oli 20 173 ristitud. Kaikiš suremb ristitišt oli 29 976 eläjad vl 1959.

Ortodoksižen hristanuskondan kuz' pühäpertid oma olmas lidnas: koume jumalanpertid i koume časounäd.

Galerei

• 
  L-klassan puruvedim-muštnik päraudtestancijanno (2021)
• 
  Avtobusstancii i «Ekspress»-torguindkeskuz vl 2007
• 
  Abdulino-päraudtestancijan sauvuz vl 2009

Irdkosketused

• Abdulino-lidnümbrikon oficialine sait (mo-ab.orb.ru). (ven.)