Ščučje (lidn, Kurganan agj)

Ščučje (ven.: Щу́чье) om Venäman lidn Kurganan agjan päivlaskmas. Se om Ščučjen ümbrikon (edel vn 2022 vilukud — rajonan) administrativižeks keskuseks da palaks.

Ščučje
Щучье

Lidnanznam	Flag
Valdkund	Venäma
Eläjiden lugu (2021)	8,252 ristitud
Pind	34,89 km²
Telefonkod	+7−35 244-xx-xxx
Avtokod	45
Aigvö	UTC+5 (MSK+2)

Lidnan sijaduz rajonan i agjan kartal

Istorii

Eländpunktan aluz om pandud pagenuziden manmehiden Keskuzvenämaspäi Ščučje-küläks vl 1750. Sai nimitust järven edeližen nimen mödhe (ven.: Большое Щучье vn 1805 kartal), se oli haugidenke. Saudihe Transsiban «Čeläbinsk — Omsk»-augotižpalan Čumläk-raudtestancijad (ven.: Чумляк) žilonno vl 1896. Nimitihe stancijad lähižen žilon i penen jogen mödhe, sikš miše raudten eziauguine projekt ezimeleti Čumläk-žilon läbitandad (se žilo om tähäsai i ei ole lidnan palaks). Kätihe Ščučje-žilod radnikžiloks vn 1942 kezal. Se sai lidnan statusad vn 1945 16. päiväl semendkud. Udesnimitihe raudtestancijad lidnan mödhe vl 1974.

Ščučje šingotase sömtegimištol (jauhon i leibän tehmine, sötken živatoiden täht pästand, villänpurnud), omblendan i pilindmaterialiden edheotandoil, mugažo himižen azegišton likvidacijan tegimen nomer viž (radoi vll 2009−2015) uz' profiliruind mäneb vspäi 2020 i sodapalakundad sijadasoiš lidnanno. Ende lämoinsambutimiden tegim radoi, krekeran pästand oli.

Geografijan andmused

Lidn sijadase Uralantagaižes, Nifanskoje-järven pohjoižrandal (5,33 km²), 165 m ü.m.t. keskmäižel korktusel.

Matkad Čeläbinskan agjan röunhasai om 35 km päivlaskmha, Kurganhasai om 165 km päivnouzmha orhal, 176 km avtol vai raudtel. Lähembaine lidn om Šumih 34 km päivnouzmha orhal, 39 km «Irtiš»-avtotrassadme (R-254) vai Transsib-raudtedme. Trass om saudud kahtes kilometras lidnan pohjoižröunaspäi.

Tobmuz

Ščučje oli lidnankundan üks'jäižeks eländpunktaks. Lidnankundan pind oli 34,89 km².

Lidnankundan tobmuden pämez' oli sen Administracijan pämez'. Lidnan Administracii om likvidacijan pordhal, likvidator om Lüdmila Gorbanenko vn 2024 semendkuspäi, edeline likvidacižen laudkundan ohjandai om Irina Jevstignejeva (sügüz'ku 2022 — semendku 2024). Radoiba lidnan pämehikš: Jurii Dorošenko (tal'vku 2020 — sügüz'ku 2022), Il'ja Panfilov (reduku 2018 — eloku 2020), Vladimir Tamahin (heinku 2008 — sügüz'ku 2018). Lidnan Dum om likvidacijan pordhal, Maksim Ionin om likvidacižen laudkundan ohjandajan vn 2022 heinkuspäi. Anna Vetrova radoi Duman ezimehen vn 2022 kezakuhusai.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 973 ristitud, rajonan pol', vn 2021 — 8 252 ristitud. Kaik 9 775 eläjad oli lidnas vl 2017. Kaikiš suremb lidnan ristitišt oli 11 094 eläjad vl 1989.

Ortodoksižen hristanuskondan Jumalanmaman Kazanin jumalaižen koume jumalanpertid oma saudud lidnas: vanhan sauvuz (om sätud vodele 1880) kävutase toižin, pordaigaline om saudud vll 1991−2000, kezaline pühäpert' om letud vll 2015−2021.

Lapsiden opendusen aluzkundad oma kuz' päivkodid, Rosinka-progimnazii («kastkuine»), nell' keskškolad (nomer 1..4), čomamahtoiden škol, lapsiden da norišton sportškol. Lähembaine professionaližen opendusen aluzkund sijadase Šumihas. Edel 2010. vot Čumläkan profškol nomer 18 radoi, ühtištadihe Al'menevo-žilon profškolanke (nüg. agrariž-tehnologine tehnikum).

Irdkosketused

• Lidnan da sen ümbrikon tobmuden sait (щучанский-округ.рф). (ven.) (+ avtomatine känduz anglijan i saksan kelihe)